Notícies Veir istoric
Er Equip de Govèrn inície eth plan de reactivacion economica a conseqüéncia dera crisi sanitària dera COVID-19 damb era contractacion de personau temporau pendent er ostiu
S’incorporarà ath mon laborau a 35 trabalhadors, damb er objectiu d’ajudar a dinamizar era economia locau, en tot incrementar en relacion a d’auti ans era dotacion de personau temporau en un moment excepcionau d’ua grèu crisi economica
Er Ajuntament de Vielha e Mijaran met en foncionament eth plan
de reactivacion economica, a trauès deth quau un totau de 35 persones deth
municipi trabalharàn enguan ena administracion locau. Aguestes incorporacions,
que supause un increment de quate viatges eth numerò d’efectius en relacion a
ans anteriors, refortilhen era plantilha dera brigada d’òbres e servicis, neteja viària e bastisses e servicis
administratius.
Aguesta accion ven mercada laguens des mesures generades per Equip de Govèrn a conseqüéncia dera crisi
sanitària, e que s’aprovèren damb ua modificacion de crèdit en passat Plen Municipau damb lèu 400.000€ en
ajudes. En aguesti moments se destinaràn 150.000€ ara contractacion de personau, de manèra qu’ajudarà a
activar e dinamizar era economia locau. Era COVID-19 a generat ua situacion
excepcionau, qu’a provocat, tanben, ua grèu crisi economica qu’afècte a fòrça
familhes. Des deth consistòri, ua des prioritats dera accion economica e sociau
actuau ei precisament fomentar eth trabalh public a compdar de plans aucupacionaus entà poder facilitar er accès ath mon laborau as
persones que son en caumatge.
“Des der Ajuntament de
Vielha e Mijaran trabalham entà dinamizar era economia e ajudar as persones en
situacion de caumatge, damb era contractacion de personau pendent er ostiu en
tot fomentar eth trabalh public”, comente eth baile de Vielha e Mijaran, Juan
Antonio Serrano. E hig que “ara mès que jamès, eth consistòri a d’èster ath
costat dera ciutadania entà hèr front ara situacion de crisi actuau”.
14/07/2020