Notícies Veir istoric
Er equip de govèrn der Ajuntament de Vielha e Mijaran s’amasse damb es grops dera oposicion entà parlar sus era situacion deth Palai de Gèu
Es problèmes qu’arrossègue era installacion pendent es darrères decades, lèu des sòns inicis, constaten eth besonh de replantejar eth futur dera installacion entà assegurar era sua viabilitat
Damb er objectiu de balhar tota era informacion ath respècte atau coma entà consensuar possibles solucions ath torn deth Palai de Gèu, eth passat diuendres er equip de govèrn der Ajuntament de Vielha e Mijaran s’amassèc damb es pòrtavotzes des grops dera oposicion entà tractar era situacion actuau pera que passe aguest equipament.
Aguesta installacion arrossègue problèmes estructuraus des sòns inicis ençà, qu’an comprometut era sua viabilitat ath long des ans ath temps qu’an condicionat es pressupòsti municipaus pendent fòrça ans.
Entà afrontar aguesta situacion, er equip de govèrn municipau coordinadament damb eth Conselh Generau d’Aran, comencèc a dessenhar, abantes dera crisi deth COVID-19, un plan de viabilitat tà garantir eth sòn futur pendent es pròplèu 25 o 30 ans, entà presentar-lo ara Secretaria General de l’Esport dera Generalitat de Catalunya, damb qui s’a contactat entà demanar eth sòn supòrt en aguest ahèr.
De hè ans, eth mantenement deth Palai de Gèu supause ath torn deth 20% deth pressupòst annau deth municipi, hèt que condicione de forma important es recorsi municipaus. Pendent era passada legislatura, gràcies as gestions der alavetz deputat dera Val d’Aran, Francés Boya, amassa damb eth baile de Vielha e Mijaran, Juan Antonio Serrano s’artenhec eth supòrt, per prumèr viatge, dera Deputacion de Lleida, qu’apòrte 100.000€ annaus tad aguesta installacion.
Es problèmes deth Palai de Gèu vien de luenh, en 2016 er Ajuntament amortizèc es 462.000€ de dus credits bancaris (sollicitadi es ans 2008 e 2011) que govèrns anteriors demanèren a nòm de VIGESA, empresa publica que gestionaue era installacion. Aguesta amortizacion dificultèc fòrça es compdes publics, sustot des ans 2016 e 2017. Totun, damb aguest esfòrç, s’artenhec en 2017 que Vielha e Mijaran siguesse un des cap-lòcs mens endeutadi dera província de Lleida.
A tot açò, i cau híger que, entà complir damb aquerò qu’establís era Lei de Racionalizacion e Sostenibilitat des Administracions Locaus, er Ajuntament auec de liquidar en an 2017 era societat mercantila VIGESA per èster deficitària e damb grèus problèmes financèrs, e recuperar era concesion deth Palai de Gèu en tot assumir era gestion deth servici coma pròpri, en tot subrogar ath personau coma es prèstecs bancaris que i auien, incrementant era despena municipau. Aguesta situacion obliguèc ar Ajuntament pendent mès d’un an a restructurar tot eth servici e adaptar-lo ara normativa dera administracion locau, autant ena contractacion de servicis coma ena part laborau.
De 2015 ençà, s’an realizat constantes intervencions en Palai de Gèu destinades a melhorar es installacions. Era actualizacion des condicions energetiques (pr’amor que non s’auien passat inspeccions tecniques jamès), eth cambi des cortines de separacion dera pista de gèu damb es piscines, es melhores des piscines entà evitar filtracions d’aigua, melhores enes sales e crompa de materiau e maquinària esportiva, son quauques des mès destacades. A tot açò, cau híger que, en 2018, calec hèr front a inondacions e ara pana en sistèma de refrigeracion dera pista de gèu, que provoquèc eth sòn barrament pendent nau mesi e que, fin finau, dempús de mantier negociacions damb er Ajuntament de Barcelona e era Secretaria General de l’Esport, se podec arténher eth loguèr d’ua pista mobila provisionau enquia 2022.
Era evolucion deth Palai de Gèu des de 2015 enquia ara, a nivèu d’abonadi tanben a estat significativa. Alavetz er equipament compdaue damb 468 sòcis apuprètz, e pendent era passada legislatura, er aument a estat considerable enquia un maxim de 876, ua donada des mès nautes des dera dubertura dera installacion en 1994.
Atau donc, damb aguesta amassada, er equip de govèrn a volut mantier un esperit de collaboracion damb es diuèrses fòrces politiques municipaus, damb era volontat de trabalhar entà assegurar eth futur dera installacion, des sòns usatgèrs e trabalhadors.