Notícies Veir istoric
Vielha e Mijaran daurís es parcs infantils a compdar d’aguesta dimenjada
Entà evitar eth risc de contagi dera COVID-19 i aurà aforament limitat, e s’auràn de mantier mesures de seguretat: mascareta obligatòria entara mainadèra de mès de 6 ans, distanciament d’1,5 mètres e calerà lauar-se es mans
A compdar d’aguesta dimenjada, en tot coincidir damb era finalizacion der estat d’alarma, er Ajuntament de Vielha e Mijaran torne a daurir es parcs infantils de tot eth municipi dempús de tres mesi barradi. Mès aguesta dubertura se produsirà en tot auer-i cèrtes limitacions entà previer eth contagi dera COVID-19 ena entrada ena ’naua normalitat’.
En aguest sens, en toti es parcs i aurà un aforament limitat entà evitar que i age aglomeracions en aguesti espacis. Atau madeish, s’auràn de complir diuèrses normes de seguretat e igiene: era mainadèra qu’age mès de 6 ans aurà de portar obligatoriament era mascareta mentre se trape en tot jogar laguens des parcs infantils (e es adults), s’aurà de mantier era distància interpersonau d’1,5 mètres e calerà lauar-se es mans. Es usatgèrs traparàn pannèus informatius damb totes es mesures que s’an de seguir entath corrècte emplec des parcs.
Cada dia, er Ajuntament de Vielha e Mijaran desinfectarà es parcs infantils entà garantir que s’amendrís eth risc de contagi dera COVID-19.
“Ei ua grana notícia entara nòsta mainadèra, e tanben entàs pairs e mairs, era dubertura des parcs infantils de tot eth municipi. Dempús de tres mesi barradi pera crisi sanitària dera COVID-19, era joenalha pòt tornar a gaudir d’aguesti emplaçaments”, comente eth baile de Vielha e Mijaran, Juan Antonio Serrano. E ahig: “gessetz a jogar e divertitz-vos, mès damb prudéncia. S’a acabat er estat d’alarma mès eth risc de contagi encara i è present e, per tant, ei de besonh complir es normes de seguretat e igiene, e atau poderam evitar repunts dera pandémia”.
21/06/2020