Notícies Veir istoric
Vielha e Mijaran redaurís es equipaments esportius municipaus damb era entrada ena fasa 3 de desescalada
En Palai d’Espòrts e eth Centre Polivalent i aurà un limit de grops de 20 persones damb era practica d’espòrts sense contacte, en tot sollicitar cita prealabla
Aguesta
setmana, en tot trapar-se Vielha e Mijaran ena fasa 3 de desescalada der estat
d’alarma actuau, er Ajuntament a decidit daurir es equipaments esportius
municipaus en tot respectar es mesures de seguretat e d’igiene establides peth
govèrn centrau.
En aguest sens, aguesti dies se tornen a daurir ath
public eth Palai d’Espòrts e eth Centre Polivalent. Aguesti
equipaments esportius poderàn èster emplegadi per grops d’un maxim de 20
persones, en tot demanar cita prealabla en Ajuntament entath sòn emplec. Poderà
èster utilizat autant per clubs esportius coma per particulars e i aurà dus torns: un de
maitin e un de tarde, en tot deishar diuèrses ores entre torns entà poder
realizar era corresponenta desinfeccion des installacions.
Atau
madeish, tanben serà disponible eth skate park. Aguesta pista ar aire liure
sonque poderà èster emplegada per un usatgèr ath viatge, en tot permeter-se era
concentracion d’enquia 20 persones maxim en entorn, en tot respectar tostemp
era distància interpersonau de 2 mètres.
Pendent
es darrèri dies, eth consistòri a trabalhat ena realizacion de prètzhèts de
mantenement e desinfeccion d’aguesti espacis esportius, en tot deishar-les enes
condicions avientes entara practica esportiva. Ath delà, es usatgèrs i traparàn
enes installacions gels antiseptics, pannèus informatius entath sòn corrècte usatge, atau coma papèr de mans d’un usatge
entà shugar-se e lordères de tapa d’emplec damb eth pè. Tanben seràn
obligatòries es mascaretes enes espacis comuns (exceptat dera practica
esportiva) entà evitar contagis dera COVID-19. Er accès as vestiaris serà
restringit, sonque serà permetut er emplec des lavabos, e se recomane que cada
usatgèr pòrte era sua bevenda.
Non serà permetuda era entrada de gent coma public, de manèra que cada emplec
se realizarà a pòrta barrada.
Er
objectiu ei poder tornar a emplegar, pòc a pòc, aguesti equipaments esportius,
mès en tot fomentar sonque es espòrts que siguen sense contacte, e que
garantissen, precisament, era distància de 2 mètres entre es usatgèrs. Coma
exemple d’espòrts que se pòden practicar trapam eth badminton, tennis o eth
tennis taula. De manèra, qu’encara demoren proïbidi es espòrts d’equip a on i a
contacte coma eth fotbòl sala, eth bàsquet o eth vòlei, ne tanpòc serà permetut
eth jòc liure.
Aguesti
equipaments s’ahigen ath Palai de Gèu e es pistes de fronton e pàdel, que ja
èren dubèrtes ath public.
“Damb era entrada ena fasa 3 de desescalada, ja podem
començar a daurir toti es equipaments esportius municipaus, que permet ara
nòsta ciutadania tornar a gaudir dera practica esportiva enes installacions municipaus damb ua cèrta normalitat”,
comente eth baile de Vielha e Mijaran, Juan Antonio Serrano. E rebrembe que “era fasa 3 implique respectar ues mesures de seguretat e
d’igiene qu’encara son vigentes en estat d’alarma. Mentre dure aguest periòde
excepcionau, les auram de complir, en tot previer naui repunts dera COVID-19.
Ei responsabilitat de toti/es eth bon emplec des normes enes installacions
municipaus”.