Notícies Veir istoric
Er Ajuntament de Vielha e Mijaran inície eth tramit entà decretar eth barrament d’activitat d’un establiment deuant der incompliment dera nòrma pendent er estat d’alarma
Enes darrèri dies s’a metut en risc era salut publica, un hèt denonciat peth pròpri Ajuntament deuant era situacion viscuda en quauqui establiments e terrasses de Vielha, a on s’a verificat era manca d’aplicacion des mesures de seguretat
Era
darrèra setmana es Mossos d’Esquadra amassa damb es Agents Municipaus inicièren
ua campanha informativa ena que realizèren ua inspeccion des terrasses e dèren
a conéisher as diuèrsi establiments d’ostalaria qu’an daurit ath public pendent
era fasa 1 e 2 der estat d’alarma, es condicions de dubertura des terrasses,
ena que se limite en per Orde Ministeriau ath 50% dera aucupacion de taules e
cagires dera licéncia municipau der an 2019. Se verifiquèc que quauqui
establiments variauen pendent era jornada eth nombre de taules e cagires en tot
incrementar er aforament as
madeishi nivèus que pendent er an anterior, sense respectar era distància de
seguretat interpersonau.
Enes darrèri dies s’an arrecebut reïterades
quèishes per part dera ciutadania sus es situacions que se genèren en quauques
terrasses deth municipi e er Ajuntament a metut en coneishença des Mossos d’Esquadra era situacion entà que poguen intervier e
hèr que se respècten es mesures de seguretat front ara COVID-19. Per aguest
motiu, ath delà, s’inície eth tramit entà decretar eth barrament d’ua activitat
qu’en dia d’ager amassèc un nombre
anautit de persones deuant deth sòn establiment sense cap tipe de control sus
mesures de distanciament interpersonau e
de seguretat que mèrquen es autoritats sanitàries e per non disposar des
respectives licéncies municipaus entà amiar a tèrme tau activitat.
“Enes darrèri dies auem verificat grèus problèmes en compliment des mesures de seguretat deuant dera COVID-19 que mos pòden hèr anar entà darrèr en aguest procès de desescalada que preten retornar-mos a ua naua normalitat e a on er emparament dera salut publica ei çò de mès important, en tot complir damb es nòrmes qu’es autoritats sanitàries apliquen pendent aguesta situacion excepcionau”, comente eth Baile de Vielha e Mijaran, Juan Antonio Serrano. E ahig que “er Ajuntament a de préner decisions drastiques entà non méter en risc era salut publica, pera manca de solidaritat e compromís de diuèrsi ciutadans e establiments".