Notícies Veir istoric
Vielha e Mijaran aurà uarts urbans d’usatge vesiau entà 2021
Er Ajuntament se trape en tot redactar eth projècte que preten implementar ath torn de 70 uarts, de 70 m2, damb zònes d’aparcament e de picnic, destinadi ara ciutadania que non dispause de finques entà trebalhar-les
Er
Ajuntament de Vielha e Mijaran trebalhe damb es servicis tecnics era redaccion
deth projècte entath desvolopament de uarts urbans damb er objectiu de destinar
solèrs municipaus as vesins e vesies que volguen semiar es sues pròpries
verdures, frutes e ortalécies.
Aguest
projècte supausarie eth bastiment ath torn de 60 o 70 uarts urbans d’uns 70m3
damb zònes d’aparcament e de picnic, que serien disponibles entara ciutadania
que non dispause de finques. Aguesta activitat s’amie a tèrme deuant eth besonh
d’implementar er autoconsum, damb ua agricultura sostenibla, e coma responsa
ara nauta demana qu’a recebut eth consistòri per part dera gent pendent es
darreri ans. Ei previst qu’eth projècte sigue en foncionament en 2021.
“Aguesta iniciativa des uarts urbans qu’amiaram a tèrme des der
Ajuntament preten fomentar er autoconsum e dar responsa a ua demana qu’en es
darreri ans arribaue ar Ajuntament per part dera ciutadania”, comente eth baile de Vielha
e Mijaran, Juan Antonio Serrano. E hig que “ei ua mesura damb caracter
ambientau, participatiu e sociau, en tot tier en compde que fòrça gent que non
dispause de finques poirà trebalhar era tèrra coma tostemp s’a hèt en
municipi”.