Notícies Veir istoric
Era Glèisa Sant Miquèu de Vielha acuelherà era celebracion de Santa Quitèria aguest diuendres 22 de mai
Fin finau era Fasa 1 de desescalada permet era celebracion d’aguest tipe d’actes damb era limitacion d’un tèrç dera capacitat dera glèisa, e servirà entà mantier era tradicion, a despièch de non poder hè’c en sòn lòc abituau
Aguest pròplèu diuendres 22 de mai, a compdar des 19:30, era Glèisa Sant Miquèu de Vielha acuelherà era missa de Santa Quitèria deuant era impossibilitat de celebrar-la en sòn lòc abituau (airau der Espitau de Vielha, ena boca sud deth tunèl de Vielha), com a conseqüéncia der estat d’alarma vigent provocat pera crisi sanitària deth Covid-19.
En aguest sens, e en tot trapar-se Vielha e Mijaran laguens dera Fasa 1 de desescalada, se permet era celebracion d’aguesta missa damb cèrtes limitacions de seguretat e d’igiene: Sonque se poirà aumplir un tèrç dera capacitat totau dera glèisa, se mantierà un espaci de seguretat entre es persones, calerà emplegar mascaretes, i aurà d’auer dispensadors de gels idroalcoolics, s’aurà d’indicar er espaci abilitat entàs assistents, calerà evitar eth contacte personau e non se poderàn tocar cap objècte de devocion.