Notícies Veir istoric
Eth BOE publique es naues mesures entàs establiments comerciaus e d’ostalaria en tot auançar era sua dubertura entad aguest deluns 11 de mai
Se permeterà era mobilitat des persones entre municipis e pera region sanitària der Alt Pirineu e Aran, era dubertura de terrasses damb un maximal de 50% d’aucupacion e manten era dubertura de negòcis d’enquia 400 mètres
A
compdar d’aguest deluns, en tot coïncidir damb era entrada dera Val
d’Aran
ena fasa 1 de desescalada
decretada peth govèrn centrau, se permeteràn es amassades de
persones damb un nombre maximal de dètz, sense compdar es qui
conviuen e sense limit de temps. Atau madeish, se permeterà era
mobilitat pes desparièrs territòris que compren era region
sanitària der Alt
Pirineu e Aran
compausat pera Val d’Aran
e es comarques dera
Alta Ribagorça, Pallars
Sobirà, Pallars Jussà, Alt Urgell e Cerdanya,
qu’an entrat ena fasa 1, en tot mantier-se proïbida era liura
circulacion per d’auti territòris, a excepcion d’aqueri casi
permetudi pes autoritats.
Ath delà, tanben se permeten es
visites enes domicilis de familhaus o amics — en tot excludir es
residéncies dera gent grana —, tostemp e quan se tròben ena
madeisha província o region sanitària o eth desplaçament sigue
degudament justificat. E non entad aqueri que presenten simptòmes
deth covid-19
o siguen en isolament domiciliari.
Aguesta
fasa de desescalada
tanben permet qu’es establiments otelèrs, comerciaus e de
restauracion de Vielha e Mijaran, poguen auançar ena sua dubertura
entà, pòc a pòc, recuperar era vida quotidiana e era activitat
economica.
En aguest sens, des d’aguest deluns 11 de mai,
tornen a daurir es sues pòrtes es lotjaments otelèrs, atau coma es
cafeteries, bars e restaurants, que poderàn emplegar eth 50% des
taules permetudes enes terrasses ar aire liure, en tot respectar es
distàncies de dus mètres de seguretat entre es taules, e damb un
maximal de 10 persones per taula o agropacion de taules. En tot cas,
en aguesta fasa 1 demore totaument proïbit eth consum de minjar e
bevendes ath laguens des establiments de restauracion. Peth moment,
es establiments pòden véner es sòns productes entara sua
recuelhuda en locau o per servici de despartiment a domicili.
En
airau des petiti comèrci, coma ja se hec efectiu ena fasa 0, se
manten era dubertura d’aqueri negòcis que dispòsen d’enquia 400
mètres quarradi, en tot perméter era entrada de clients enquia un
maximal de 30% deth totau deth sòn aforament. D’aute biais, e en tot
seguir çò de decretat enquiara, toti es establiments que siguen
dauridi auràn de mantier un orari preferent entàs majors de 65 ans.
D’auta
banda, ena fasa 1 de desescalada
tanben se permet era realizacion de velatòris
e enterraments, damb un maximal de quinze persones se s’amien a tèrme
ar aire liure, e de dètz persones se s’efectuen en recintes barradi,
en tot respectar es mesures de seguretat e igiene. E tanben se
permeterà era assisténcia a lòcs de culte tostemp e quan non
superen un tèrç deth sòn aforament. S’indicarà es zònes
abilitades, atau coma era collocacion de dispensadors
de gels idroalcoolics.
Non se permeterà er emplec d’aigua beneïda, ne eth contacte entre
persones ne damb objèctes de culte. En aguesti eveniments, tanben
aurà d’aplicar-se es nòrmes de seguretat e igiene decretades.