Notícies Veir istoric
Er Ajuntament de Vielha e Mijaran e es EMD suspenen es romieuatges previsti entà mai pera crisi deth COVID-19
Demoren anulladi es romieuatges de Sant Joan d’Arròs, era Mair de Diu des Desamparats de Montcorbau, Santa Quitèria e era hestivitat de Sant Pònç en Vielha
Damb motiu dera esperlongacion der estat d’alarma e era prevision d’ua desescalada lenta e progressiua damb er objectiu d’evitar aglomeracions en espacis publics autant dauridi coma barradi, es Entitats Municipaus Descentralizades d’Arròs e Vila, Aubèrt, Mont, Montcorbau e Betlan e er Ajuntament de Vielha e Mijaran, an decidit suspéner es desparièrs romieuatges e hestivitats previstes entath pròplèu mes de mai en tot eth tèrme municipau.
Es hestivitats que se veiràn afectades son: romieuatge de Sant Joan d’Arròs (3 de mai), romieuatge dera Vèrge des Desamparats de Montcorbau (10 de mai), hèsta de Sant Pònç en Vielha (11 de mai) e eth romieuatge de Santa Quitèria, ena boca sud deth Tunèl de Vielha (24 de mai).
“Viuem ua situacion excepcionau e per aguest motiu mos obligue a suspéner aguesti romieuatges tradicionaus des nòsti pòbles. Enes pròplèu dies previsiblament entraram laguens d’un procès de desescalada, mès auem de contunhar atents entà que era situacion torne ara normalitat çò d’abans possible”, comente eth baile de Vielha e Mijaran, Juan Antonio Serrano. E ahig que “auem d’èster conscienti que çò de prumèr, ara madeish, ei garantir era salut des nòsti/es vesins/es. Un objectiu compartit tanben pes desparièrs presidents des EMD de Vielha e Mijaran”.
20/04/2020