Notícies Veir istoric
Er Ajuntament de Vielha e Mijaran apròve era mocion de supòrt ara Lei de Consultes
En plen deth consistòri damb 10 vòts a favor e 1 en contra
Aguest deluns 22 de seteme er Ajuntament de Vielha e Mijaran a aprovat damb 10 vòts a favor e un en contra, en plen deth consistòri, era mocion de supòrt ara lei de consultes que diuendres passat avalèc eth Parlament de Catalonha.
En plen celebrat pendent eth maitin, s’a aprovat era mocion de supòrt ath pòble catalan de cara ara consulta deth 9 de noveme, qu’encara non a estat convocada de manèra oficiau, damb 10 vòts a favor, de Convergéncia Democratica Aranesa (CDA) e Unitat d’Aran (UA), e eth vòt en contra deth Partit Popular (PP).
Eth baile de Vielha e Mijaran, Alex Moga, a declarat que “en aguest moment a on era situacion politica de Catalonha ei importanta, mos somam ad aguesta mocion de supòrt, donques eth dret a decidir ei totauments democratic”. Sus eth papèr deth país aranés, Moga a comentat: “En cas que gessesse er òc ena consulta, calerie negociar un nau encaish politic dera Val d’Aran en Catalonha”.
Era mocion, que s’a includit en acta coma un ahèr d’urgéncia, arrespon ara lei de consultes que diuendres passat 19 de seteme s’autorizèc en plen extraordinari deth Parlament de Catalonha, damb 106 vòts en favor (CiU, ERC, PSC, ICV-EUiA e CUP) e 28 en contra (PP e C’s).
D’auti ahèrs que tanben s’an aprovat e se trobauen en acta deth plen son er ampliament d’equipaments comunitaris en Arròs e Vielha, e era modificacion dera ordenança reguladora de subvencions.