Notícies Veir istoric
Er Ajuntament de Vielha e Mijaran poténcie es tramits a trauès dera sedença electronica
Era ciutadania pòt contunhar en tot realizar mès de 100 tramits damb eth consistòri a trauès dera sedença electronica mejançant un certificat digitau (IdCat Mobil) que pòden demanar de franc per Internet
A compdar dera declaracion der estat d’alarma coma prevencion deth coronavirus COVID-19 decretat peth govèrn centrau, es servicis d’atencion ath public der Ajuntament de Vielha e Mijaran s’amien a tèrme unicament a trauès dera atencion telefonica e telematica.
En aguest sens, des deth consistòri se vò potenciar er emplec dera sedença electronica de Vielha e Mijaran entà qu’es ciutadans deth municipi poguen realizar mès de 100 tramits administratius. Entà poder he’c, sonque cau dispausar d’un certificat digitau, qu’en Internet se pòt obtier de franc. Aguest certificat ei er IdCat Mobil, qu’ei basat en enviament de contrassenhes temporaus, damb unic emplec a trauès deth telefòn mobil. Entà sollicitar-lo, cau visitar era plana web http://idcatmobilcat/, e identificar-se damb eth DNI, era targeta sanitària e un numerò de telefòn mobil.
Damb aguest certificat digitau se pòt accedir ara sedença electronica der Ajuntament de Vielha e Mijaran (https://vielha-mijaran.eadministracio.cat/) e realizar es tramits sense auer de personar-se ena administracion. Ath delà, cada Entitat Municipau Descentralizada dispause dera sua sedença electronica pròpria (http://www.vielha-mijaran.org/ar/menu/seden-tilde-secta-electronica/69/) entàs tramits a realizar en cada pòble.
Er IdCat Mobil ei un estrument qu’er Ajuntament de Vielha e Mijaran ja abilitèc ena primauera de 2018, damb eth quau es tramits son fòrça mès rapids e agils, e era ciutadania a un contacte dirècte damb era administracion a distància, en tot he’c mès comòde.
“Des der Ajuntament volem rebrembar, qu’a despièch de qu’eth consistòri demore barrat ath public, se pòt contunhar en tot hèr es tramits qu’es ciutadans/es agen de besonh, a trauès dera sedença electronica, que hè dus ans qu’ei en foncionament e tanben telefonicament des 8 ores enquia es 14 ores de deluns a diuendres”, comente eth baile der Ajuntament de Vielha e Mijaran, Juan Antonio Serrano.
“En tot aguest temps, aguesta plataforma digitau a foncionat fòrça ben, e a supausat un pas endeuant ena transformacion digitau dera administracion. En aguest sens, encoratjam as vesins/es a emplegar-la entà quinsevolh escrit o sollicitud qu’ajatz de besonh”, ahig era còsso de naues tecnologies, Vanessa Fandiño.