Notícies Veir istoric
Er Ajuntament de Vielha e Mijaran estúdie implementar un paquet de mesures economiques e un plan de contingéncia entà hèr front ara crisi peth coronavirus COVID-19
Aguest maitin, un viatge mès, s’a tornat a amassar eth Comitè de Crisi de Vielha e Mijaran entà avalorar e estudiar es possibles mesures que s’auràn d’activar enes pròplèus dies entà palliar era crisi e era desaceleracion economica que s
Eth Comitat de Crisi de Vielha e Mijaran s’a amassat aguest maitin entà començar a analisar es possibles conseqüéncies economiques qu’aurà era crisi peth coronavirus COVID-19 en airau municipau, autant a nivèu pressupostari dera institucion, coma en teishut empresariau e sociau deth municipi.
En aguest sens, s’estúdie era reorganizacion des diuèrsi recorsi e servicis municipaus entà poder priorizar e atier es principaus besonhs dera ciutadania e deth teishut empresariau. En çò que toque ath tèma dera facturacion institucionau, se garantissen toti es pagaments e s’auance eth termini que mèrque era lei.
Atau madeish, tanben s’estúdie era implementacion d’ajudes sociaus entàs familhes mès afectades e vulnerables, ath delà de possibles ajornaments e bonificacions en taxes e/o impòsti, en foncion de çò qu’establisque e regule er Estat. Totes es mesures que se poguen començar auràn ua grana afectacion en pressupòst municipau, de manèra que s’aurà de reestructurar e priorizar es besonhs.
D’aute biais, er Ajuntament manten un continu contacte e coordinacion damb eth Conselh Generau d’Aran, en tot seguir es indicacions qu’establissen, atau coma damb eth departament de benestar sociau d’aguesta institucion, damb qui se trabalhe entà establir un procediment de deteccion e contraròtle entà dar atencion e seguiment as persones mès vulnerables deth municipi a trauès deth personau deth departament de servicis sociaus.
“Èm conscienti deth damatge economic que cause e causarà aguesta pandèmia en municipi. Era Nòsta major preocupacion ei es ciutadans e eth teishut empresarial e, per açò, enes pròplèu dies calerà préner mesures dificiles e drastiques” comente eth baile de Vielha e Mijaran, Juan Antonio Serrano. E ahig que "coma destinacion toristica qu’èm, auem d’èster capables d’anticipar-mos a toti es problèmes que son per vier e hèr tot çò de possible entà mitigar-les e ajudar en tot çò que sigue enes nòstes mans, entà tornar ara normalitat çò abans possible".