Notícies Veir istoric
Vielha e Mijaran acuelherà era 4au edicion des Jornades Europèes de Cinèma de Montanha eth 14 e 15 de març
Pendent er eveniment se projectaràn quate pellicules premiades en hestivau Mendi Film de Bilbao de 2019 e se liuraràn es premis deth 3au concors de cuertmetratges dera categoria escolara
Aguest maitin s’a presentat
ena sala de plens der Ajuntament de Vielha e Mijaran, era 4au edicion des
Jornades europèes de Cinèma de Montanha “Mendi Tour” qu’aurà lòc es pròplèu 14
e 15 de març. Un hestivau que forme part deth projècte Interreg POCTEFA
“Reiaume der Aneto”. Era presentacion a anat a cargue deth baile de Vielha e
Mijaran, Juan Antonio Serrano, e era mairia deth hestivau, Edurne Pasaban.
Er eveniment, qu’aurà lòc ena
Audiovisuau de Vielha, començarà eth 14 de març entàs 19:00 damb eth liurament
des prèmis deth 3au concors de cuertmetratges dera categoria escolara, qu’an
presentat es alumnes de 4au, 5au e 6au cors de Primària dera Escòla Garona.
Dempús s’encetaràn es projeccions damb eth cuertmetratge “Harria Herria”
(Seccion Oficiau). Ara seguida se projectarà “Cholitas” (Prèmi deth Jurat). Eth
15 de març, entàs 19:00 se projectarà “Nebula” (Melhor Cuertmetratge) e dempús
“Manaslu” (Prèmi deth Public).
Coma nauetat, eth Mendi Tour
cambie de dies, en tot celebrar-se dissabte e dimenge, entà favorir qu’autant
era gent que ven de dehòra, coma es vesins e vesies dera Val d’Aran, agen mès
facilitats entà presenciar es pellicules.
Era entrada ath Mendi Tour
serà de franc enquia completar er aforament dera sala. Se pòden recuélher es
entrades en Ajuntament de Vielha e Mijaran en orari d’atencion ath public (de
deluns a diuendres de 08:00 a 14:00) e ena Agéncia Kabi (Avenguda Pas d’Arró,
40, baishi, de 10:00 a 13:00 e de 17:00 a 20:00). Cau tier en compde qu’eth
maxim d’entrades que se pòden recuélher ei de dues per persona, entà garantir
qu’er aforament se pogue completar.
“Aguest
hestivau ei ua grana escasença entà qu’era gent dera Val d’Aran e de dehòra,
veigue granes pellicules restacades damb era montanha, en un municipi coma eth
nòste, qu’a coma ua des mèrques identitàries, er entorn naturau e eth suenh
deth miei ambient, que mos place coma ua destinación de referéncia enes
Pirenèus”,
comente eth baile de Vielha e Mijaran, Juan Antonio Serrano. E hig que “demori qu’enguan torne a èster un exit
d’assisténcia, coma en ans anteriors, a on er aforament siguec plen. E
arregraïsqui a toti es collaboradors pera sua implicacion en aguest
projècte”.
Pera sua part, Edurne Pasaban,
a remercat era qualitat des films que se projectaràn “en tot èster ua seleccion des melhores pellicules deth Mendi Film de
Bilbao, que de ben segur agradaràn a toti/es es amants dera montanha, que
venguen ara Audiovisuau”.