Notícies Veir istoric
Era EMD de Betren recupère era tradicionau Hèsta de Magràs
Dimenge, es vesins/es deth pòble celebraràn aguesta hèsta en tot recuperar ua tradicion a on se passaue pes cases deth pòble demanant tot tipe de productes entà codinar crespèths e trueites
Aguest pròplèu dimenge, es vesins/es de Betren celebraràn,
dempús de fòrça ans, un aute viatge era Hèsta de Magràs. Ua hèsta que hège mès
de 25 ans que se deishèc de hèr, e que se vò tornar a recuperar.
Ath torn des 18 ores, era
mainadèra gesserà disfressada pes carrèrs, en tot anar, casa per casa, cantant
cançons tradicionaus de Magràs, e demanant tot tipe de productes (ueus, haria,
lèit, etc.) entà codinar crespèths e trueites, entre d’auti, que se minjaràn en
sopar popular.
Dempús de finalizar damb eth
pòrta a pòrta, deuant dera sala sociau deth pòble se cremarà eth pipòt de
Magràs, en tot cantar e barar ath torn deth huec.
Un viatge cremat eth pipòt,
autant es pairs/mairs, coma era mainadèra, gaudiràn d’un sopar vesiau damb eth
que finalizarà era hèsta.
“Des
dera EMD de Betren, amassa damb es nòsti/es vesins/es, mos auem metut d’acòrd,
en tot creir qu’ère de besonh recuperar ua hèsta damb fòrça tradicion en pòble,
coma ei Magràs”,
comente eth president dera EMD de Betren, Marc Cuny. E hig que “demoram qu’aguesta hèsta vage fòrça ben, que
servisque entà afrairar ara nòsta gent, e pogam instaurar-la definitivament en
calendari culturau deth pòble”.