Notícies Veir istoric
Era Bibliotèca Generau de Vielha presente es activitats deth sòn 18au aniversari
Deth 25 ath 30 de noveme i aurà tot tipe d’activitats culturaus en aguest equipament: talhèrs, conferéncies, charrades, club de lectura, condacondes e eth liurament des prèmis de fotografia e de microrelats
Era Bibliotèca Generau de Vielha a hèt public eth pannèu damb es actes de celebracion deth sòn 18au aniversari en collaboracion damb er Ajuntament de Vielha e Mijaran. Enguan, aguesta hita aurà lòc pendent era setmana deth 25 ath 30 de noveme.
Er aniversari se comencèc hè ues setmanes damb un parelh de concorsi. Per un costat, era 4au edicion deth Concors de Microrelats a trauès deth hilat sociau Twitter. Entà participar cau que cada usatgèr d’aguesta plataforma seguisque eth compde dera Bibliotèca, e que ’piule’ un relat de 280 caràcters. Enguan, era tematica escuelhuda entath concors ei era gastronomia, mès a d’èster un microrelat de creacion pròpria e que non age estat premiat en d’auti concorsi. Es ’piulades’ en aguest concors se pòden enviar enquiath pròplèu 22 de noveme.
Ath delà, tanben se trape en marcha eth 3au Concors de fotografia “Eth Mèn repopet”, qu’amie a tèrme era Bibliotèca, amassa damb er Ajuntament e er airau de Pediatria der Espitau Val d’Aran. Aguest concors preten mostrar era vida vidanta des repopets: ath torn deth leitatge maternau, es jòcs, es minjars, eth dromir… Es fotografies s’an d’enviar ara adreça electronica biblioteca@vielha-mijaran.org enquiath 21 de noveme.
En çò que tanh as activitats pròpries d’aquera setmana, eth calendari ei eth següent:
Deluns 25 de Noveme: Talhèr manuau damb Kristina Nart, places limitades.
Dimars 26 de Noveme: Trobada deth club de lectura sus eth libre “Els Matins de l’Aran” dera autora Teresa Pàmies. E, entàs 20:00, charrada a cargue de Claudi Aventín Boya.
Dimèrcles 27 de Noveme: Entàs 20:00, conferéncia en motiu deth centenari dera mòrt de Mn. Jusèp Condò Sambeat, a cargue de Claudi Aventín Boya.
Dijaus 28 de Noveme: Entàs 17:30, activitat de “Libres entà Créisher” damb Imma Caubet. E, entàs 19:00, liurament des prèmis des concorsi de Microrelats e de fotografia “Eth mèn repopet”.
Diuendres 29 de Noveme: Entàs 18:00, talhèr de codina damb Kuki’s.
Dissabte 30 de Noveme: Entas 17:30, Condacondes damb “Qui s’ha fet pipí al Mississipi?”, cargue de Mosaic llibres.
“Un an mès, er Ajuntament de Vielha e Mijaran collabòre estretament damb era Bibliotèca Generau de Vielha entà aufrir un ample programa d’activitats culturaus entà commemorar un nau aniversari d’aguest equipament”, comente era còsso de Cultura de Vielha e Mijaran, Raquel Martínez. E hig qu’“en mèn nòm e en de tot er Ajuntament, feliciti ara Bibliotèca e as sòns trabalhadors per mantier viua aguesta installacion pendent tanti ans e que poguen contunhar fòrça ans mès damb aguest espaci qu’ei fòrça important entath municipi”.