Notícies Veir istoric
Vielha serà er epicentre d’ua jornada de formacion en supòrt vitau basic, en alimentacion saludabla, proteccion civila e emergéncia
Eth pròplèu 28 de noveme, ath torn de 130 alumnes de 5au e 6au d’Educacion Primària, des desparières escòles dera Val d’Aran, participaràn en ua jornada plea d’activitats, que les formaràn en airaus basics de cara ara vida adulta
Eth pròplèu 28 de noveme Vielha acuelherà ua jornada de formacion as alumnes des desparières escòles dera Val d’Aran, en airaus coma eth supòrt vitau basic, era alimentacion saludabla, proteccion civila e emergéncia que les a de servir coma ensenhament entara vida adulta.
En aguest sens, 130 alumnes, apuprètz, des corsi de 5au e 6au dera Educacion Primària, participaràn en ua jornada plea d’activitats damb er objectiu de que coneishen, aprenen e aquerissen actituds sus quina a d’èster ua alimentacion saludabla, coma actuar en cas de presenciar un accident de transit, o realizar espòrt.
Aguesta activitat ei organizada peth Conselh Generau d’Aran, a trauès deth Conselh Esportiu dera Val d’Aran, amassa damb era Escòla Garona e er Institut d’Aran, es escòles de Les, Bossòst e es escòles ZER, er Ajuntament de Vielha e Mijaran, Aran Salut, es Pompièrs d’Aran e es Mossos d’Esquadra.
Er orari d’activitats serà entre es 10:30 e es 14:00, en tot auer-i grups d’un maxim de 20 alumnes per grup, distribusidi per diuèrsi equipaments de Vielha, en tot interactuar pendent mieja ora en cadua des activitats organizades.
Laguens deth programa previst, es Pompièrs d’Aran aufriràn un simulacre d’un rescat de montanha, es Mossos d’Esquadra simularàn un accident de transit, en tot mostrar eth metòde deth PAS (Prevencion e socors en cas d’accident), Aran Salut (concretament er airau de pediatria) aufrirà talhèrs d’alimentacion saludabla e tanben i aurà activitats esportives, coma ei eth cas dera zumba.
Era jornada finalizarà ena Escòla Garona, a on toti es participants dinaràn amassa entà agermanar as alumnes de tota era Val d’Aran.
“Des der Ajuntament de Vielha e Mijaran credem qu’ei fòrça important formar as nòsti joeni/es en accions vitaus coma son es prumèri auxilis, saber practicar era RCP (reanimacion cardio-paumonau), o coma actuar deuant d’accidents o quinsevolh problèma de salut que poguen presenciar ena vida vidanta”, comente eth baile de Vielha e Mijaran, Juan Antonio Serrano.
Pera sua part, eth dusau tinent d’alcalde, Alberto López, manifèste que “era preparacion dera mainadèra deuant de possibles scenaris d’ua vida d’adults, les ajudarà a créisher e a madurar, pr’amor qu’an d’èster conscienti qu’es simulacres que receberàn o es talhèrs d’alimentacion saludabla, son causes serioses, e des quaus cau préner consciéncia quan abantes melhor”.