Notícies Veir istoric
Er Ajuntament de Vielha e Mijaran met en foncionament era 5au edicion dera programacion culturau familhara “Vielha en Scena”
Eth cicle, que s’amie a tèrme ena Sala Era Audiovisuau, cònste de sies actuacions que comence eth pròplèu 9 de noveme e finalizarà eth 4 d’abriu, a un prètz de 5€ per session
Aguest pròplèu dissabte, 9 de noveme, comence ua naua edicion deth cicle de programacion culturau familhara “Vielha en Scena” qu’amie a tèrme er Ajuntament de Vielha e Mijaran en collaboracion damb era associacion Aran Teatre. Enguan, aguest cicle arribe ara 5au edicion, e ei format per un totau de sies actuacions qu’auràn lòc un dissabte ath mes pendent eth cors escolar 2019-2020.
Eth 9 de noveme s’encèten es activitats damb er espectacle “OOPPS!!” a cargue de Teatre mòbil. Eth 7 de deseme i aurà era actuacion de Jordi del Río, titolada “MENUDA COMEDIA”. En 2020, contunharàn es activitats er 11 de gèr damb er espectacle “MINUTS” de Marcel Gros. Er 1 de hereuèr Sergi Buka aufrirà “MAGIKISSIM”. Eth 3 de març, El negro y el flaco presentaràn “ALQUIMIA”, e eth 4 d’abriu, eth cicle Vielha en Scena barrarà es pòrtes damb Sgratta Teatre e era sua actuacion “La Princesa en Texans”.
Totes es actuacions s’amiaràn a tèrme ena Sala Era Audiovisuau de Vielha entàs 18:00 e a un prètz de 5€. “Damb aguesta 5au edicion de Vielha en Scena, consolidam ua aufèrta fòrça divertida entara mainadèra, damb prètzi populars”, comente era còsso de cultura de Vielha e Mijaran, Raquel Martínez. E hig que “aguest cicle se some a totes es actuacions gratuïtes qu’er Ajuntament aufrís pendent tot er an as mès petiti e dubèrta a toti es publics”.