Notícies Veir istoric
Er Ajuntament de Vielha e Mijaran signe un convèni damb era AMPA dera Escòla Garona e damb er Institut d’Aran entà subvencionar era crompa de nau equipament informatic
Es escolans/es de 4au e 5au auràn naui ordenadors gràcies ara aportacion de 3500€ per part der Ajuntament, mentre qu’es alumnes der Institut d’Aran dispausaràn de nau materiau digitau damb ua subvencion maxima de 5000€
Er Ajuntament de Vielha e Mijaran a formalizat er acòrd de collaboracion damb es centres educatius deth municipi de cara ath cors escolar 2019-2020.
En aguest sens, eth consistòri a signat un convèni damb era AMPA dera Escòla Garona de Vielha, per valor de 3500€, a trauès deth quau ajudarà ena crompa de naui ordenadors que poderàn gaudir es escolans de 4au e 5au cors dera Educacion Primària. Aguest acòrd supause era prorròga deth convèni de collaboracion que ja s’amièc a tèrme en 2017 e 2018. D’aguesta manèra, es alumnes d’aguesti corsi poderàn gaudir d’un ordenador en programa Aran 1x1 pendent eth cors escolar 2019-2020.
Ath delà, er Ajuntament a signat un convèni damb er Institut d’Aran peth quau ajudarà ath centre educatiu en renauiment der equipament informatic qu’an de besonh es escolans dera Educacion Segondària. Concretament, balharà supòrt economic entà aquerir caishes enes parets (RACK), ordenadors, pantalhes en paret, nau cablejat, projectors e pissarres digitaus. Tot açò, damb ua quantitat maxima de 5000€.
“Des der Ajuntament de Vielha e Mijaran èm conscienti qu’autant era Escòla Garona coma er Institut d’Aran an de besonh equipaments informatics en bones condicions, mès encara en mon digitau que viuem aué dia, entà poder prestar un servici d’ensenhament de qualitat entàs nòsti/es escolans/es”, comente eth baile de Vielha e Mijaran, Juan Antonio Serrano. E hig que “er Ajuntament tostemp a apostat per collaborar en çò qu’agen de besonh es centres educatius de Vielha e Mijaran, entà qu’es joeni/es agen es màgers facilitats possibles ena sua formacion academica”.
31/10/2019