Notícies Veir istoric
Ua òbra d’emergéncia ena carretèra municipau de Mont obligue a celebrar un plen extraordinari eth pròplèu 29 d’octobre
Eth projècte, atau coma es aspèctes tecnics, an estat realizadi pera Diputació de Lleida, e ena execucion compdaràn damb era collaboracion deth Conselh Generau d’Aran, en ua accion que s’amiarà a tèrme abantes der iuèrn
Eth pròplèu 29 d’octobre, er Ajuntament de Vielha e Mijaran s’amassarà en plen de manèra extraordinària, entà aprovar ua accion d’emergéncia en camin municipau de Vilac a Mont e Montcorbau.
Aguesta òbra supause er apariament d’un mur que se trape entre eth pk 0,450 e 0,480 en marge esquèr deth camin, ena vessant deth Cap de Cròdos. Era intervencion ei catalogada d’urgenta, pr’amor que i a veritable perilh de que se pogue produsir bèth esbaussament en aguest tram deth camin. Com a conseqüéncia der estat deficient d’aguest mur, s’an generat henerècles e deformacions transversaus ena cauçada dera carretèra d’accès a Mont e Montcorbau.
Es servicis tecnics dera Diputació de Lleida, a demana der Ajuntament, amièren a tèrme ua visita d’inspeccion en agost e, des d’alavetz, segontes er informe presentat, s’a detectat un empejorament deth mur, en tot auer-i mès henerècles, que son fòrça visibles ena carretèra. Ath delà, en tot apropar-mos ara sason d’iuèrn, tanben se pòt agravar era situacion pera possible aparicion de filtracions d’aigües causades pes temporaus. Tot açò, provocarie un colapse deth mur.
En conseqüéncia, e en tot seguir es directritzes der informe presentat pera Diputació de Lleida, en plen se prepausarà era reparacion dera estructura deth mur, en tot èster catalogada coma òbra d’emergéncia. Aguesta intervencion s’a avalorat iniciaument en 109.309,05€. Ena sua execucion i collaboraràn autant era Diputació de Lleida coma eth Conselh Generau d’Aran.
“Des
der Ajuntament de Vielha e Mijaran auem
actuat
damb
emergéncia,
a
partir deth moment qu’auem estat coneishedors deth perilh que
supausaue,
pr’amor qu’ei en risc era accessibilitat
des vesins/es des pòbles de Mont e Montcorbau. Volem evitar que i
age bèth tipe d’esbaussament ena carretèra, ja que non i a cap auta
alternativa d’accès”,
comente eth baile de Vielha e Mijaran, Juan Antonio Serrano. E hig
que “aguesta
intervencion serà prèsta abantes dera arribada der iuèrn, en tot
supausar es menors inconvenients possibles ara ciutadania”.
24/10/2019