Notícies Veir istoric
Satisfaccion generala pes bones chifres dera Escòla d’Adults Val d’Aran de Vielha
Eth deluns 15 de deseme, s’an presentat es bones chifres dera Escòla d’Adults (CFA) Val d’Aran de Vielha, enes installacions deth centre de formacion qu’a compdar des sòns inicis a triplat es sòns escolans e tanben a aumentat era sua aufèrta formativa. Tanben s’a invertit entara digitalizacion des aules e era aufèrta formativa a artenhut un estandard de qualitat fòrça naut.
Era directora dera Escòla d’Adults Val d’Aran, Montse Garcia, a mostrat eth balanç des darrèri ans, e a compdar deth cors 2011/12 es places aufrides an pujat de 285 a 360 en an actuau. Tanben eth percentatge e nombre d’escolans a creishut de manèra considerabla: 165 en 2011/12, çò que signifique 58% des places; e actuauments se compde damb 300 escolans, 83%. Deth totau der alumnat, cau destacar, qu’es places d’ensenhaments iniciaus s’an aucupat ath 100%.
Er alcalde de Vielha e Mijaran, Alex Moga, a declarat que “era Escòla d’Adults a agut ua fòrça bona evolucion e açò ei un reflèxe dera sensacional aufèrta formativa deth municipi. E açò ei gràcies ath trabalh conjunt deth Departament d’Ensenyament, eth Conselh Generau d’Aran e er Ajuntament de Vielha e Mijaran”. Moga tanben a apuntat: “Cau destacar que fòrça d’aguesta aufèrta va dirigida ara integracion en mon laborau, donques se compde damb eth francés e er anglés, dus estruments claus e reaus dera nòsta societat”.
Eth director des Servicis Territoriaus de Lhèida, Miguel Àngel Cullerés, a destacat “era progression positiva deth centre tant en nombre d’escolans coma es indicadors de satisfaccion e es melhores de gestion, donques çò d’important non ei pas era quantitat, senon era qualitat”. “En pòqui territòris auem ua aufèrta tan concentrada e ampla coma ena Val d’Aran, atau que desiram qu’es aranesi contunhen en tot apostar pera formacion.”, a finalizat Cullerés.
En acte tanben sigueren presents: era còssa Luisa Estevez; er inspector dera Escòla d’Adults CFA Val d’Aran, Josep Lluís Boix; e era coordinadora des centres d’Adults de Lhèida, Loreto Benet.
15/12/2014