Notícies Veir istoric
Eth Centre de Joenessa “Antara” de Vielha e Mijaran torne a daurir es sues pòrtes entad aguesta tempsada 2019-2020
A compdar d’aguest diuendres eth centre serà dubèrt de diuendres a dimenge enquiara fin deth cors escolar, entà qu’es joeni d’entre 12 e 18 ans agen un espaci especific entà da eri
Eth Centre de Joenessa “Antara” de Vielha e Mijaran torne a èster en foncionament, un aute viatge, a compdar d’aguest pròplèu diuendres. D’aguesta manèra era joenessa deth municipi poderà gaudir dera installacion pendent totes dimenjades.
Er orari de dubertura d’Antara ei de diuendres a dimenge, des 17:00 enquias 21:00. Aguest ei er orari abituau que se mantierà pendent tot eth cors escolar. Sonque i aurà modificacions entà Nadau e Pasca, quan eth servici s’ampliarà entà corbir es vacances escolares.
Antara a coma objectiu qu’es joeni agen un espaci damb recorsi especifics entà da eri, en tot potenciar eth sòn desvolopament personau e innovador, fomentar abituds saludables, de conviuença e era sua integracion ena societat.
Aguest centre va dirigit, sustot, as joeni qu’an entre 12 e 18 ans. S’i pòden adreçar autant a nivèu individuau, coma es diuèrsi collectius qu’i a. Eth centre dispause d’un dinamizador que favorís eth corrècte foncionament der espaci, e fomente era programacion d’activitats dirigides as diuèrses franges d’edats des joeni que l’empleguen.
“Un an mès tornam a daurir es pòrtes deth Centre de Joenessa entà qu’es joeni de Vielha e Mijaran poguen gaudir d’un espaci entà amassar-se e divertir-se pendent es dimenjades. Er exit deth prumèr an mos augure ua naua sason damb fòrça joeni implicadi en sòn foncionament”, comente eth dusau tinent d’alcalde e còsso de joenessa, Alberto López. E hig que “contunham en tot aufrir-les un pialèr d’activitats abituaus entà dinamizar aguest espaci e qu’eri tanben mos aufrisquen era sua opinion sus quines causes an de besonh, entà adaptar aguest servici as sons besonhs".
17/10/2019