Notícies Veir istoric
Comencen es òbres d’engodronament deth passeig fluviau der arriu Garona en Vielha
A compdar dera pròplèu setmana s’amiarà a tèrme era òbra en tram des der Institut d’Aran enquiath pònt plaçat deuant dera Plaça dera Generalitat
Er Ajuntament de Vielha e Mijaran començarà aguesta pròplèu setmana es trabalhs d’engodronament deth passeig fluviau der arriu Garona a compdar der Institut d’Aran enquiath pònt plaçat deuant dera Plaça dera Generalitat.
Aguesta intervencion durarà ath torn de quinze dies, en tot engodronar tot eth camin de tèrra qu’entornege es zònes ajardinades d’aguest parçan deth Solan de Vielha.
“Damb aguesta accion pretenem méter en valor ua zòna de Vielha fòrça transitada pes familhes deth pòble, coma ei er entorn der arriu Garona, a on ei fòrça abituau veir ara gent passejar pes zònes ajardinades”, comente eth còsso d’òbres e servicis, Jacint Cuny. E hig que “complim damb ua promesa electorau, en tot melhorar era estetica de Vielha, tà deisha’c ara nautada de çò que merite era nòsta gent”.
D’aute biais, pendent aguest madeish periòde de temps tanben s’amiarà a tèrme ua melhora des trepaders d’ua part des carrèrs de Vielha. Concretament s’apariaràn es trepaders dera Avenguda deth Solan, ath cant der Institut d’Aran, e es trepaders dera part nauta dera Avenguda Pas d’Arró.
28/09/2019