Notícies Veir istoric
Ua pèrta en hilat d’aigua deth Palai de Gèu obligue a barrar era installacion temporaument
Era pana s’a produsit ena canerada generau d’aigua, que s’esvrentèc en accès ath gimnàs e a provocat era acumulacion d’enquia 15 cms d’aigua
Aguest dimenge, ua pana ena canerada generau d’aigua deth Palai de Gèu de Vielha, a obligat ath barrament temporau dera installacion. Era canerada s’esvrentèc en correder d’accès ath gimnàs e s’an acumulat enquia 15 centimètres d’aigua.
Pendent tota era jornada de dimenge, es Pompièrs d’Aran, amassa damb es trabalhadors deth Palai de Gèu, era brigada municipau e era empresa de neteja, trebalhèren entà trèir era aigua qu’i auie enes diuèrsi airaus der equipament, entà poder facilitar es prètzhèts de neteja e secat, entà tornar ara normalitat çò de mès dora possible.
Es zònes mès perjudiciades an estat es sales d’aerobic, Cosmen e Spinning, e tanben a entrat aigua en rocòdrom, enes locaus dera entrada e en es vestiaris. D’aute biais, eth gimnàs, era piscina, era pista de gèu e era bibliotèca non an patit damnatges.
Pendent aué deluns e deman dimars contunharàn es trabalhs entà auançar çò mès lèu possible ena sua dubertura, damb era ajuda deth personau dera installacion, brigada municipau e brigada deth Conselh Generau d’Aran, que per prumèr viatge, deuant d’ua situacion d’urgéncia a mostrat eth son interès entà recuperar era normalitat en Palai de Gèu damb rapidesa.
Per tot açò, eth Palai de Gèu demorarà barrat pendent diuèrsi dies entà recuperar eth subministrament d’aigua e eth servici d’aigua sanitària entàs banhs e doches. Ath delà, cau acabar d’eliminar tota era umiditat dera installacion entà esvitar possibles problèmes de condensacion en tot er equipament. Un viatge qu’eth subministrament der aigua sigue restablit, tornaràn a èster disponibles es servicis que non an patit damnatges, coma son era piscina e era pista de gèu. En gimnàs s’an d’acabar d’amiar a tèrme trabalhs qu’encara non s’an acabat en solèr, derivadi d’ua auta pèrta d’aigua que se patic era passada setmana.
Cau remercar, qu’eth sindic d’Aran, Francés Boya, truquèc ath baile de Vielha e Mijaran, Juan Antonio Serrano, entà mostrar era sua preocupacion peth problèma qu’a sorgit e an acordat trabalhar conjuntament entà cercar solucions definitiues ara problematica que rosigue eth Palai de Gèu des de hè fòrça ans. Precisament, aguesta problematica non ei naua, e comence a èster fòrça critica era sua situacion. Vielha e Mijaran non pòt respóner solet deuant d’ua installacion dera quau s’en beneficie tota era Val d’Aran e era província de Lhèida damb era unica pista de gèu qu’existís, en tot èster ua oportunitat clara entath territòri tà contunhar en tot fomentar er espòrt autant ludic coma de naut nivèu e apostar pera indústria esportiva.
“En nòm der Ajuntament, voi arregraïr as persones qu’an trabalhat tot eth dimenge entà solucionar eth problèma qu’auem patit en Palai de Gèu”, comente eth baile municipau, Juan Antonio Serrano. E hig que “per prumèr viatge, coma baile de Vielha e Mijaran, eth síndic d’Aran m’a trucat preocupat pera situacion, en tot èster d’acòrd en que cau júnher esfòrci entre es administracions entà trapar ua solucion ara grèu situacion dera installacion. Enquiara auem artenhut ajudes economiques dera Diputació de Lleida e dera Secretaria General de l’Esport, mès non son sufisentes entà solucionar eth problèma qu’auem”, precise Serrano.
23/09/2019