Notícies Veir istoric
Vielha includís era igualtat de genre en tradicionau acte de coronacion des Reines e Dames d’Aunor dera Hèsta Major, en tot incorporar as òmes
Enguan s’a cambiat aguesta nomenclatura, en tot crear es figures des Fradins/es e Fradins/es Majors, entà garantir era igualtat en ua des tradicions dera Hèsta
Era igualtat arribe tanben enes tradicions dera Hèsta Major de Vielha. Enguan, era abituau coronacion des Reines e Dames d’Aunor dera Hèsta incorpòre ua nauetat fòrça importanta, en tot híger tanben as òmes. D’aguesta manèra, se cambien aguestes figures pes de Fradins/es e Fradins/es majors, en tot recuperar aguest títol que tradicionaument hège referéncia as gojats encargadi d’organizar es hèstes e es balhs deth pòble.
Per prumèr viatge, es òmes tanben auràn aguesta distincion qu’enquiara sonque ère reservat entàs hemnes. Enguan, coma ei eth prumèr an que s’a decidit aguesta naua nomenclatura, sonque i aurà Fradins/es e Fradins/es Majors entre es adults, mentre qu’entàs mès joeni sonque i aurà mainades, que seràn Fradines e Fradina Major infantil.
Aguesta decision arribe en un moment en qu’era igualtat entre genres ei çò que se vò arténher deuant d’ua accion que tradicionaument a estat exclusiu entàs hemnes, en tot modernizar era Hèsta. Es pròpris membres dera Comission de Hèstes, qu’ei d’a on s’escuelhen es Fradins/es e Fradins/es Majors, an decidit qu’es òmes tanben agen aguest protagonisme.
Per tant, enguan, entre es mès grani, Ares Pagès a estat escuelhuda coma Fradina Major e Alba Manero coma Fradina, e seràn acompanhades per Andreu Perdices coma Fradin Major e per Alberto Ginés coma Fradin. Mentre, qu’entre es mès petiti, se manten sonque era preséncia femenina. Ariadna Sirat a estat escuelhuda coma Fradina Major, e Adriana Pérez e Eliana Gómez seràn Fradines.
“Era Hèsta Major de Vielha sage d’èster ath capdeuant de çò que mèrque era societat aué dia, e per açò, entà contunhar en tot modernizar es hèstes, enguan incorporam era igualtat de genre en tot híger tanben ath sector masculin damb es figures des Fradins/es e Fradins/es Majors, en tot recuperar ua figura tradicionau deth pòble”, comente eth prumèr tinent d’alcalde, Alberto López.
“Ei important qu’era gent sigue conscienta de qu’era garantia d’igualtat entre genres s’artenh en tot aufrir era madeisha oportunitat autant as hemnes coma as òmes en ua des tradicions dera Hèsta Major de Vielha. En aguest sens, voi arregraïr as pròpris membres dera Comission de Hèstes qu’agen mostrat aguesta maduresa e conscienciacion, en tot decidir qu’es òmes e es hemnes agen era madeisha consideracion e oportunitat d’èster coronadi”, hig era còsso d’Igualtat, Raquel Martínez.
30/08/2019