Notícies Veir istoric
Er Ajuntament de Vielha e Mijaran forme ara Comission de Hèstes en matèria de violéncia sexuau en espacis de léser nocturn damb motiu dera Hèsta Major
Er objectiu a long termini ei qu’era formacion sus era violéncia sexuau s’estene a toti es airaus dera societat, e que toti es agents implicadi ena organizacion de hèstes e activitats de léser agen es estruments entà poder actuar s’ei de besonh.
Er Ajuntament de Vielha e Mijaran a amiat a tèrme ua jornada de formacion damb es membres dera Comission de Hèstes de Vielha sus eth protocòu de seguretat contra es violéncies sexuaus en activitats de léser, ath quau s’i a aderit recentament eth consistòri.
Aguesta accion ei fonamentau entà poder amiar endeuant era implementacion deth Punt Segur pendent es pròplèu Hèstes Majors de Vielha (deuant dera Sala de Hèstes deth 7 ath 10 de seteme) entà qu’es membres dera Comission poguen saber de quina manèra an d’actuar en cas de que se pogue produsir bèth cas d’agression sexuau pendent es hèstes.
Ena formacion, ath delà des còssos der Ajuntament que hèn part d’aguesta iniciativa, tanben i sigueren presents Magda Fraga, coma representant dera Associacion pera Igualtat en Aran, que serà era responsabla deth Punt Segur pendent era Hèsta Major, Fanny Revilla coma tecnica compartida de Joenessa, e representants des Mossos d’Esquadra.
Era activacion deth protocòu, amassa damb eth Punt Segur, ei ua des accions entà desvolopar eth Plan d’Igualtat d’Oportunitats de Hemnes e Òmes de Vielha e Mijaran aprovat en 2018. Des der Ajuntament, se preten conscienciar sus eth besonh dera formacion a nivèu sexista. Eth passat mes de junh, ja s’amièc a tèrme ua formacion entre es trabalhadors dera administracion sus er emplec corrècte deth lenguatge non sexista, e laguens deth Plan d’Igualtat ei previst que i age mès accions formatives.
Des der Ajuntament trebalharam entà qu’es bars d’òci nocturn s’aderissen a d’aguest protocòu, de manèra individuau en tot formalizar eth tramit damb eth Departament d’Interior dera Generalitat de Catalunya e, pendent era Hèsta de Vielha, eth consistòri demanarà era sua collaboracion ena difusion dera campanha, en tot balhar-les informacion sus eth protocòu e convidar-les a forma-ne part.
Er objectiu ei, qu’a long termini, era formacion sus era violéncia sexuau se pogue balhar a quinsevolh agent que pogue èster implicat en agressions d’aguest tipe, entà saber de quina manèra s’a d’actuar. Ei responsabilitat de toti es implicadi, esvitar qu’aguesta lacra sociau se pogue esténer ena societat.
“Era adesion a d’aguest protocòu ei important, pr’amor qu’ei de besonh saber coma actuar en cas de patir o presenciar bèth cas de violéncia sexuau. Era formacion ei fonamentau, e volem que se pogue esténer a toti es airaus dera societat, pr’amor qu’es agressions se pòden produsir en quinsevolh lòc”, comente era còsso d’Igualtat, Raquel Martínez. E hig que “en pròpri Ajuntament contunharam en tot adaptar eth protocòu. Auem de dar exemple ara societat, e coma mòstra de conscienciacion damb aguest problèma, contunharam en tot formar as trabalhadors entà previer cap tipe de problèma sexista”.