Notícies Veir istoric
Vielha e Mijaran aparie es depòsits d’aigua d’Arròs e de Vila
Damb aguesta inversion de mès de 300.000€ se resòlv, en bona part, ua reivindicacion istorica d’aguesti dus pobles. Eth consistòri demore que, pendent aguesta legislatura, se pogue resòlver definitivament aguesta problematica
Er Ajuntament de Vielha e Mijaran a licitat es òbres de remodelacion des depòsits d’aigües d’Arròs e Vila, de manèra qu’enes pròplèu mesi aguesti equipaments seràn en un corrècte foncionament entàs vesins e vesies d’aguesti pòbles deth municipi.
Era inversion conjunta qu’amie a tèrme er Ajuntament compde damb un pressupòst de mès de 300.000€, en tot encetar un cicle de reformes enes depòsits d’aigua qu’encara manquen per realizar, ja que se trapen en un estat fòrça deficient. Er an passat s’inicièc ua intervencion de manteniment en bona part des depòsits municipaus, pr’amor que hège mès de 15 ans qu’ena majoria d’eri non s’auien amiat a tèrme trabalhs de neteja. Ua accion que ja supausèc un pressupòst de 70.000€ e servic entà detectar d’autes deficiéncies des depòsits.
Era actuacion enes depòsits d’aigua d’Arròs e Vila ei er inici d’un plan d’accion der Ajuntament enes depòsits municipaus qu’an de besonh ua intervencion mès prigonda. “Damb aguestes accions pretenem deishar en condicions avientes tot eth hilat d’aigua de boca deth municipi d’aciu a fins de legislatura, en tot enténer qu’aguest ei un servici municipau basic entara ciutadania” comente eth còsso d’Òbres e Servicis, Jacint Cuny.