Notícies Veir istoric
Er Ajuntament de Vielha e Mijaran active eth protocòu de seguretat contra es violéncies sexuaus en activitats d’òci damb motiu des Hèstes Majors de Vielha
Enguan, per prumèr viatge se compdarà damb un espaci plaçat ena entrada dera Sala de Hèstes pendent es sessions de balh, integrat per gent formada en aguest ahèr entà denonciar casi de violéncia sexuau
Deth 7 ar 11 de seteme, Vielha tornarà a víuer, un an mès, era celebracion des Hèstes Majors. Enguan, entà garantir eth respècte, era igualtat de valors e eth civisme, er Ajuntament de Vielha e Mijaran met en foncionament ua naua iniciativa entà sensibilizar ara gent sus era violéncia sexuau: eth Punt Segur. Un espaci d’informacion e atencion as victimes d’agressions sexuaus (autant verbaus coma fisiques), de manèra qu’era seguretat des persones sigue garantida ath long dera Hèsta.
Eth Punt Segur serà plaçat ena entrada dera Sala de Hèstes de Vielha, en tot èster integrat per gent formada academicament en aguest ahèr. Aguest emplaçament preten sensibilizar e informar sus era tematica des violéncies sexuaus, en tot establir-se coma lòc que garantís era seguretat, eth confòrt, atau coma un espaci de denóncia en cas d’auer patit ua agression o auer-la presenciat.
S’i trobarà materiau d’informacion, sensibilizacion e prevencion, en tot assegurar era confidencialitat en cas de denonciar quinsevolha agression. Atau madeish, es membres deth Punt Segur amiaràn a tèrme era foncion d’acompanhament e actuacion immediata.
Eth Punt Segur serà en foncionament pendent es nets deth 7,8,9 e 10 de seteme, pendent era celebracion des diuèrses sessions de balh organizades.
Aguest espaci ei eth resultat dera aplicacion d’un protocòu de seguretat contra es violéncies sexuaus en entorns d’òci, ena qu’er Ajuntament trabalhe amassa damb un conjunt d’agents que son de besonh entath corrècte desvolopament d’aguest espaci, entre es quaus i a eth personau organizador des Hèstes (Ajuntament e Comission de Hèstes), gent formada en ahèr dera violéncia sexuau, e personau de seguretat (Mossos d’Esquadra, Vigilants Municipaus personau de seguretat des Hèstes e contròl d’accès ara Sala de Hèstes).
“Vielha e Mijaran vò èster un referent ena igualtat e eth respècte dera ciutadania. Ei per açò, qu’auem creat eth Punt Segur. Volem garantir qu’era gent pogue gaudir des Hèstes Majors, sense que i age cap tipe de conflicte. Es agressions sexuaus non an cabuda ena nòsta societat, e des der Ajuntament trabalham entà esvitar qu’aguesta lacra sociau sigue presenta en un des moments mès demorats de tot er an”, comente eth baile de Vielha e Mijaran, Juan Antonio Serrano. E hig que “compdam damb un equip preparat e format en matèria de violéncia sexuau, atau coma damb era collaboracion des agents de seguretat. Toti amassa trabalham entà garantir er exit des Hèstes Majors de Vielha, entà poder gaudir de totes es activitats, mès tostemp damb civisme”.
Ath delà, des der Ajuntament se promò eth consum responsable d’alcoòl, entà hèr préner consciéncia ara ciutadania, pr’amor qu’era diversion non a d’èster sinonim d’excèssi ne de manca de contròl.
Per tant, pendent es Hèstes Majors de Vielha, se patim o presenciam bèra agression sexuau, podem adreçar-mos ath Punt Segur, mès tanben podem trucar ath telefòn d’Emergéncies 112 o ath telefòn Contra era Violéncia Masclista 900 900 120 (atencion 24 ores).
23/08/2019