Notícies Veir istoric
Excellents resultats enes enquèstes de satisfaccion des familhes dera Escòla Mairau “Era Cunhèra”
Coma cada an, aguest centre educatiu municipau a amiat a tèrme un sondatge entre es familhes usatgères dera escòla que, de forma anonima, an avalorat eth foncionament deth centre, en tot puntuar ahèrs coma eth servici de minjador
Era Escòla Mairau “Era Cunhèra” de Vielha a recebut fòrça bones critiques per part des pairs e mairs des alumnes pendent es enquèstes amiades a tèrme sus era avaloracion deth cors escolar 2018-19.
Segontes es opinions qu’an podut recuélher des deth centre, eth personau, eth minjador, es installacions e eth sòn foncionament, an obtengut ua grana avaloracion, en tot remercar era grana qualitat qu’aufrís aguest centre escolar ara mainadèra de Vielha e Mijaran ena prumèra fasa escolara dera sua vida.
En aguestes enquèstes se remèrquen eth bon tracte que receben per part des professionaus damb es pairs/mairs, en tot crear un ligam “familhar“ fòrça propèr, atau coma er estat des installacions e eth bon foncionament que ne hè eth sòn personau. Atau madeish, tanben cau remercar qu’eth servici de minjador tanben a estat fòrça ben avalorat pera màger part des pairs e mairs.
“Era Escòla Mairau “Era Cunhèra” ei un equipament capdau de Vielha e Mijaran, pr’amor qu’ei eth prumèr contacte qu’es mès petiti an damb eth mon escolar”, comente era còsso d’ensenhament, Maria Vergés, en tot híger que “entar equip de govèrn der Ajuntament ei ua grana satisfaccion veir coma eth trabalh e esfòrç der Ajuntament mès, sustot, des professionaus dera Escòla, son avaloradi pes familhes“.
22/08/2019