Notícies Veir istoric
Eth baile der Ajuntament de Vielha e Mijaran s’amasse damb era naua Junta Directiva deth Grèmi d’Ostalaria dera Val d’Aran
Ambdues institucions an parlat sus diuèrsi ahèrs restacadi damb eth torisme e era promocion economica de Vielha e Mijaran, en tot profitar era bona entesa e eth trabalh qu’er Ajuntament amie a tèrme en aguest sector fonamentau dera economia muni
Aguest maitin, eth baile de Vielha e Mijaran, Juan Antonio Serrano e eth còsso de Governacion, Ramon González, an arrecebut ena sedença der Ajuntament ara naua Junta Directiva deth Grèmi d’Ostalaria dera Val d’Aran, escuelhuda en mes de junhsèga, e dirigida peth sòn nau president, Xacobe Bartolomé.
En aguesta amassada, ath delà dera presentacion des naui membres deth Grèmi, ambdues institucions an tractat desparièrs ahèrs restacadi damb eth sector toristic e de promocion economica de Vielha e Mijaran.
En aguest sens, an parlat sus era situacion actuau que viu eth torisme, e des deth Grèmi an trasladat era preocupacion qu’es empreses deth municipi les an transmetut, especiauments era problematica dera manca de viuenda de loguèr en territòri. Era bona entesa qu’existís entre ambdues institucions favorís que i age ua collaboracion estreta entà tractar aguesti ahèrs e eth compromís de trabalh entà melhorar er estat deth sector toristic municipau en benefici deth conjunt dera economia.
“Des der Ajuntament èm conscienti dera importància qu’a eth sector toristic de Vielha e Mijaran, coma motor fonamentau dera economia e en mantenement e era creacion de lòcs de trabalh”, comente eth baile, Juan Antonio Serrano. E hig que “eth potenciau dera nòsta ostalaria, era gastronomia, eth comèrç e deth patrimòni en generau, ei vitau entà garantir eth benéster economic e era prosperitat de Vielha e Mijaran e deth conjunt dera Val d’Aran. Mos cau contunhar en tot trabalhar ena linha des eveniments e activitats ludiques, entà refortilhar e potenciar eth torisme en Vielha e Mijaran. Per açò, ei important qu’er Ajuntament e eth Grèmi d’Ostalaria pogam trabalhar amassa entà conéisher, de prumèra man, toti es punts fòrti e besonhs qu’a eth sector toristic”.
21/08/2019