Notícies Veir istoric
Eth govèrn municipau de Vielha e Mijaran balhe compdes ath Plen sus era assignacion des airaus des còssos entad aguesta legislatura
A trauès des dedicacions der equip de govèrn se vò respóner as besonhs deth municipi entà contunhar damb diuèrsi projèctes e accions en benefici deth benèster dera ciutadania
Aguest maitin s’a celebrat eth plen ordinari der Ajuntament de Vielha e Mijaran. En aguesta session eth govèrn municipau a balhat compdes sus era estructuracion deth pròpri govèrn e des airaus d’actuacion en foncion des còssos qu’en hèn part. De manèra, qu’ena legislatura 2019-2023 i aurà un totau de nau airaus, en tot auer hèt ua reestructuracion damb er objectiu d’agilizar era accion de govèrn.
Es airaus e còssos responsables son es següenti: Prumèr Tinent d’Alcalde, Servicis municipaus e Pedanies (Jacinto Cuny), Dusau Tinent d’Alcalde, Joenessa, Espòrts, Torisme e Comunicacion (Alberto López), Tresau Tinent d’Alcalde, Governacion (Ramón González), Quatau Tinent d’Alcalde, Naues Tecnologies, Transparéncia e Administracion electronica (Vanessa Fandiño), Medi Naturau e Paisatge (Elena Vidal), Cultura e Ensenhament (Maria Vergés), Promocion economica e trabalh (Dana Catalina Didii), Accion sociau e Participacion Ciutadana (Raquel Martínez) e era rèsta d’atribucions son competéncies deth baile, Juan Antonio Serrano, atau coma Urbanisme e Finances.
“En aguest darrèr Plen auem dat compde deth decrèt d’alcaldia a on se reestructure es airaus der equip de Govèrn entàs pròplèu quate ans damb er objectiu de distribuïr eth trebalh e poder arténher es rèptes que mos auem mercat. Ua accion de govèrn que serà intensa coma ena anteriora legislatura mès, aguest viatge, compdam damb mès persones que trabalharàn en benefici deth nòste municipi.”, comente eth baile de Vielha e Mijaran, Juan Antonio Serrano.
Ath delà, en Plen s’a balhat compde sus eth Compde Generau de 2018. En aguest sens, s’a remercat era bona gestion economica que viu er Ajuntament de Vielha e Mijaran. En aguest darrèr exercici i a agut un romanent de tresaureria de 3.183.678,04€ e un superavit de 677.129,34€. Aguesti resultats positius se complèten damb ua carga financèra de 0€, en tot mantier era institucion sense deute, auent complit era estabilitat pressupostària e es exigéncies deth tet de despena.
“Es resultats economics der an 2018 demòstren que s’a hèt un gran trabalh e, sustot, ua gestion avienta des compdes publics, que meriten es nòsti vesins e vesies, que son qui se beneficien dera nòsta accion de govèrn”, precise Serrano.