Notícies Veir istoric
Eth plen der Ajuntament de Vielha e Mijaran a aprovat era 3au modificacion de crèdit deth pressupòst que contemple, entre d’auti, era melhora des pissarres digitaus der INS d’Aran e un convèni damb er AMPA dera Escòla Garona
Aguesta modificacion contemple ua melhora deth 0,25% deth salari deth conjunt des trabalhadors dera administracion, atau coma inversions en òbres e servicis e en airau der ensenhament e es retribucions de cargues der equip de govèrn
Aguest dimèrcles, eth plen der Ajuntament de Vielha e Mijaran a aprovat en session extraordinària era 3au modificacion deth crèdit deth pressupòst municipau de 2019. Aguesta modificacion ei avalorada en 603.130,38€.
Cau remercar que laguens d’aguesta modificacion s’a aplicat ua melhora d’un 0,25% deth salari deth conjunt de trabalhadors dera administracion, ua melhora mercada peth govèrn centrau qu’auia d’entrar en vigor aguest mes de junhsèga e supause un 17% deth totau dera modificacion de crèdit aprovada. Atau madeish, era modificacion contemple tanben es retribucions a cargues der equip de govèrn que n’aguesta legislatura aumenten pr’amor des besonhs e rèptes qu’a eth municipi e qu’an de besonh persones que les amien a tèrme, coma son era implantacion definitiva dera administracion electronica, transparéncia, digitalitzacion des servicis municipaus entà melhorar era atencion as persones e contunhar en tot trabalhar en diuersi projèctes que posicionen a Vielha e Mijaran coma un referent economic e sociau des Pirinèus. Atau madeish cau rebrembar qu’aguestes retribucions son regulades damb çò qu’establís era Lei de Racionalizacion e Sostenibilitat dera Administracion Locau.
Ath delà, era modificacion contemple un aument der impòrt deth canon der aigua en 166.000€ que s’a de pagar ara Agència Catalana de l’Aigua en proporcion ara quantitat de litres d’aigua que se consumís en tot eth municipi de Vielha e Mijaran.
En airau d’òbres e servicis, s’a aprovat un increment dera partida de mantenement de carrèrs e der hilat d’aigües per impòrt de 70.000€ e tanben dera crompa de mobiliari urban. Atau madeish tanben s’aumente era partida que se destine ath mantenement des cementèris.
Per un aute costat, aguesta modificacion tanben includís diuèrses accions enes airaus d’ensenhament e joenessa. S’a aprovat ua subvencion de 5000€ dirigida a melhorar era qualitat des pissarres digitaus der INS d’Aran e tanben s’a ratificat un convèni damb er AMPA dera Escòla Garona entara crompa d’ordinadors per un valor de 3500€. E, se destine ua partida entà seguir en tot auançar ena implementacion deth Centre de Joenessa Antara, en çò que tanh as sues activitats, atau coma ua partida entà melhorar er enlumenat deth Palai d’Espòrts de Vielha, damb sistèma de lums LED.