Notícies Veir istoric
Eth jurat de Viles Florides visite Vilac abantes der acte de liurament des Flors d’Honor 2019 qu’aurà lòc en seteme
Eth baile de Vielha e Mijaran, Juan Antonio Serrano, a acompanhat as vesins e vesies de Vilac, qu’en 2018 s’incorporèc a d’aguest projècte e que guanhèren eth prèmi ara Participacion Ciutadana
Aguest dijaus, eth jurat deth projècte Viles Florides a visitat eth pòble de Vilac entà avalorar eth trabalh de decoracion des carrèrs, corraus e cases qu’es vesins amien a tèrme pendent fòrça temps, damb tot tipe de flors e plantes.
Eth baile de Vielha e Mijaran, Juan Antonio Serrano, a acompanhat as vesins e vesies deth pòble en aguesta visita, ena qu’eth jurat a pogut verificar era berèsa ornamentau de Vilac, damb er esfòrç qu’an hèt es sòns ciutadans e ciutadanes.
Vilac ei eth quatau e darrèr pòble dera Val d’Aran que s’a hijut ath projècte de Viles Florides. Era sua incorporacion se produsic er an 2018. Es auti pòbles que formen part son: Bagergue, Canejan e Arties. Eth projècte de Viles Florides ei ua iniciatiua dera Confederació d’Horticultura Ornamental de Catalunya (CHOC), que promò era transformacion de cornèrs, pòbles e ciutats de Catalonha a trauès dera planta verda.
Eth pròplèu 27 de seteme aurà lòc era ceremònia de liurament des Flors d’Honor 2019, en un acte que se celebrarà en Lloret de Mar (Girona). En an 2018 Vilac ja recebèc en aguest acte eth Prèmi ara Participacion Ciutadana.
“Des der Ajuntament de Vielha e Mijaran volem arregraïr er esfòrç qu’an hèt es vesins e vesies de Vilac entà deishar eth pòble fòrça polit e damb ua berèsa de valor incalculable”, comente eth baile municipau, Juan Antonio Serrano. E hig que “desiri a Vilac fòrça sòrt entàs prèmis Flors d’Honor d’enguan, e encoratgi ara rèsta de pòbles de Vielha e Mijaran a somar-se a d’aguest projècte, entà qu’es sòns carrèrs e cases siguen decorades damb flors e plantes, en tot deishar-les polidi a trauès dera ornamentacion”.