Notícies Veir istoric
Vielha acuelh eth pròplèu 13 de junhsèga era 3au Trail Vielha-Molières 3010 damb ua chifra recòrd de 1250 participaires
Se demore era preséncia de lèu 5000 persones damb motiu dera pròva, en tot supausar una repercusion economica tà Vielha e Mijaran de mès de 300.000€
Aguest pròplèu dissabte 13 de junhsèga, Vielha e Mijaran torne a plaçar-se coma epicentre esportiu dera Val d’Aran damb era celebracion dera 3au edicion dera Trail Vielha-Molières 3010. Ua pròva qu’en pòqui ans a artenhut ua repercusion fòrça importanta en mon des pròves de montanha (trails) autant a nivèu nacionau coma internacionau.
Enguan era participacion serà de 1250 corredors, un nau recòrd dera corsa, e que preneràn part enes 3 modalitats ja abituaus: Ena Molières Maraton (43 Kms) i aurà 500 corredors, ena Montpius Skyrace (24 Kms) i aurà 500 corredors, e ena Tuca Trail (11 Kms) participaràn un totau de 250 corredors. Coma ja a estat abituau enes edicions anteriores, i aurà participaires non sonque d’Espanha, senon tanben arribadi de desparières païsi d’Euròpa, en tot remercar eth caire internacionau qu’a era pròva.
Era Trail Vielha-Molières 3010 ei ua pròva esportiua fòrça importanta entà Vielha e Mijaran, e sustot entath conjunt deth sector toristic, pr’amor que se demore lèu 5000 sojorns pendent aguesta dimenjada, entre corredors, acompanhants e organizacion dera competicion. Era repercusion economica que se demore damb era pròva ei de mès de 350.000€.
“Damb sonque tres edicions, era Trail Vielha-Molières 3010 ja ei un referent esportiu enes Pirenèus, en tot refortilhar a Vielha e Mijaran coma referent esportiu de montanha”, comente eth còsso d’Espòrts de Vielha e Mijaran, Alberto López. E hig que “tot eth municipi se veirà beneficiat pera celebracion d’aguesta pròva, en tot supausar ua dimenjada d’ua nauta activitat en sector toristic”.