Notícies Veir istoric
Er Ajuntament de Vielha e Mijaran se some ath Dia der Orgulh LGTBI
Aguest diuendres 28 de junh se celèbre eth Dia der Orgulh LGTBI (lesbianes, gays, bisexuaus, transexuaus e intersex), e er Ajuntament de Vielha e Mijaran vò mostrar eth supòrt municipau a d’aguest collectiu enes sues reivindicacions e aspiracions, en tot remercar qu’eth municipi ei un clar exemple dera transigéncia vers era diversitat sexuau existenta. En aguest sens, vò visibilizar es drets deth collectiu e somar-se ara denóncia sociau as descriminacions qu’a patit e contunhe en tot recéber ena actualitat.
Era diversitat sexuau ei un dret reconeishut ena Carta des Drets Fonamentaus, en sòn article 21 apartat 1, a on se proïbís era discriminacion pera orientacion sexuau.
“Vielha e Mijaran ei un municipi a on predomine era tolerància e eth respècte. Arrés ei discriminat ne per motiu de sèxe, ne per motiu d’orientacion sexuau, ne de raça, ne pera sua credença religiosa, ne economica, ne per cap auta circonstància”, comente eth baile de Vielha e Mijaran, Juan Antonio Serrano.
Eth Dia Internacionau der Orgulh LGTBI se celèbre eth 28 de junh, pr’amor qu’en aguesta data se commemòren es hèts que succediren hè 50 ans, en 1969, en Stonewall (Estats Units).
28/06/2019