Notícies Veir istoric
Vielha e Mijaran contunhe en tot aufrir gessudes de Marcha Nordica entre junhsèga e octobre
Eth gran exit de participacion d’aguesta activitat assolide tres tipes de gessudes pendent era setmana de cara ar ostiu e era tardor
Er Ajuntament de Vielha e Mijaran a fixat eth calendari de gessudes de Marcha Nordica en municipi entre es mesi de junhsèga e octobre. Deuant era grana donada de participaires que i a ena practica d’aguesta activitat, s’a assolidat es tres tipes de gessudes que s’establiren en 2018: Healthy, Social e Sportive, cadua en foncion deth nivèu e era abiletat qu’a cada participaire.
Enguan ei eth quatau an qu’er Ajuntament aufrís aguesta activitat. Pendent cada an era participacion a estat un exit, e açò permet poder contunhar damb es gessudes enquiara tardor.
Era “Social”, s’amie a tèrme pendent toti es dissabtes de 09:30 a 13:30, damb era que se preten compartir, gaudir d’ua madeisha activitat, en tot conéisher gent naua mentre se practique era activitat fisica. Era “Healthy”, ei dirigida a gent sedentària o en baisha forma, que se vòlen iniciar ena activitat fisica, e qu’es mètges les ac an aconselhat per presentar factors de risc. Es gessudes son dimars e dijaus de 18:00 a 20:00. E, era “Sportive”, includís a toti aqueri que vòlen hèr trabalh fisic, damb fòrça ritme, en tot pujar es pulsacions e sudar. Er orari ei de 18:00 a 21:00 es deluns.
Era activitat dera Marcha Nordica ei gratuïta, e es lòc de trobada entà començar es activitats ei era Plaça dera Glèisa de Vielha. Ath delà, existís un grup de WhatsApp ena qu’es participaires s’i pòden híger entà poder conéisher mès informacion sus es gessudes e interactuar damb era rèsta de membres.
“Aguest ostiu contunham damb es gessudes de Marcha Nordica en Vielha e Mijaran. Era bona climatologia favorís qu’era gent volgue gésser a hèr espòrt peth nòste entorn naturau, e deuant dera nauta participacion qu’auem, seguiram cada setmana damb mès activitats”, comente eth còsso d’Espòrts, Alberto López. E hig que “auem assolidat es tres tipes de gessudes setmanaus, de manèra qu’aguesta activitat cada viatge se hè mès grana, e es resultats mos confirmen er aument constant dera participacion, e que cada viatge i a mès gent que demane prener-ne part”.