Notícies Veir istoric
Gran hèsta de finau de cors dera Escòla Mairau “Era Cunhèra” de Vielha en Era Audiovisuau
Pendent era hèsta i auec actuacions de balh e musica dera mainadèra, graduacion des alumnes de P2 e vrespalh entàs pairs e mairs aufrit per Ajuntament de Vielha e Mijaran
Aguest dimars, era Escòla Mairau “Era Cunhèra” de Vielha celebrèc era hèsta de finau de cors 2018-19 damb es alumnes dera educacion infantila en un acte qu’auec lòc ena Sala Era Audiovisuau de Vielha damb era preséncia tanben des pairs e mairs dera mainadèra.
Pendent era hèsta, que compdèc damb era còsso d’educacion, Maria Vergés, coma mèstra de ceremònies, es desparièrs corsi aufriren un seguit d’actuacions de balh e musica. Es de P0 realizèren ua actuacion dera tuna, es de P1 amièren a tèrme ua interpretacion de rock e es mès grani, de P2, premaniren ua coreografia de cabaret. Precisament es alumnes de P2 tanben celebrèren era sua graduacion, pr’amor qu’eth pròplèu cors escolar se’n van a estudiar ara Escòla Garona en P3, dempús d’auer finalizat eth cicle ena Escòla Mairau.
Entà dar comiat ara hèsta, er Ajuntament de Vielha e Mijaran aufric un vrespalh entàs pairs, mairs e era mainadèra.
“Voi arregraïr as pairs e mairs des alumnes era sua participacion aué e pendent tot eth cors escolar, e a toti es trabalhadors dera Escòla Mairau peth sòn gran trabalh ath long der an, pr’amor que toti amassa an ajudat a, qu’un an mès, aguesta installacion contunhe endeuant, en tot formar enes prumèri ans de vida ara nòsta mainadèra”, comente era còsso de Cultura, Educacion e Accion Sociau, Maria Vergés. E hig que “voi desirar molta sòrt as alumnes de P2 en nau viatge que començaràn eth pròplèu cors ena Escòla Garona, en tot contunhar damb era sua formacion academica”.
12/06/2019