Notícies Veir istoric
Vielha e Mijaran apòste peth fotbòl sala aguesta primauera, damb diuèrsi tornegi qu’an lòc en Palai d’Espòrts
Eth torneg femenin de Pasca, eth torneg infantil Objectiu 30 Ores de fotbòl sala, era AEFA Cup e es 30 Ores Fotbòl Sala Vila de Vielha, atrèn era participacion de mès de 300 persones
Vielha e Mijaran assolide ua fòrta aufèrta esportiva en municipi pendent aguesta primauera e, pròva d’açò, ei era ampla varietat de tornegi de fotbòl sala que se celèbren en Palai d’Espòrts de Vielha pendent aguestes darrères setmanes.
En Pasca, eth torneg femenin de fotbòl sala encetèc aguest cicle d’eveniments damb era celebracion dera 9au edicion d’aguesta competicion que ja ei un classic en calendari esportiu de Vielha e Mijaran. En mai, era AEFA Cup inicièc ua naua edicion, damb un totau de 10 equips locaus, e que s’esten pendent eth mes de junh, a on tanben i a dues competicions mès en jòc. Per un costat, eth torneg infantil Objectiu 30 Ores de fotbòl sala, damb 6 equips, a on es mès joeni cerquen guanhar ua competicion que lis servirà entà poder disputar en futures edicions eth torneg des 30 Ores de Fotbòl Sala Vila de Vielha, qu’enguan a lòc es dies 15 e 16 de junh. Aguest ei eth torneg classic de fotbòl sala en municipi pendent era primauera, damb era participacion d’equips aranesi, atau coma de Lleida e de diuèrsi punts de Barcelona. Enguan aguesta competicion artenh ja era 12au edicion.
Eth fotbòl sala ei un des espòrts que mès participacion atrè en Vielha e Mijaran e supause era confirmacion deth bon moment que trauèsse er espòrt en municipi, e qu’assolide eth Palai d’Espòrts de Vielha coma punt d’amassada des amants d’aguest e d’autes practiques esportives.
“Pendent es darrèri ans auem assolit qu’eth Palai d’Espòrts sigue un equipament fòrça actiu, a on acuelhem un pialèr d’activitats esportives, coma ei eth cas deth fotbòl sala, e a on s’a enregistrat un aument dera participacion en mès d’un 50% en conjunt d’aguestes activitats”, comente eth còsso d’Espòrts, Alberto López. E hig que “ara ei eth fotbòl sala, mès pendent tot er an auem ua grana diuersitat d’espòrts que se pòden practicar en aguesta installacion, en tot fomentar ua excellenta participacion autant des mès joeni coma des adults arribadi de diuèrsi endrets deth conjunt dera Val d’Aran e tanben de dehòra. Un equipament, per tant, damb ua grana importància a nivèu esportiu e sociau”.
11/06/2019