Notícies Veir istoric
Vielha torne a èster eth scenari aguest pròplèu dimenge dera gessuda e arribada dera Bonaigua Gran Fondo
Coma nauetat, enguan era 2au edicion d’aguesta marcha ciclotorista non competitiva se conforme de 3 distàncies: 114 kms (Gran Fondo), 88 kms (Medio Fondo) e 46 kms (Mini Fondo) damb era pujada ath Pòrt dera Bonaigua coma gran atractiu dera pròva
Aguest pròplèu dimenge 16 de junh arribe era 2au edicion dera Bonaigua Gran Fondo, ua marcha ciclotorista non competitiva qu’aurà Vielha coma lòc de gessuda e arribada, en tot pujar eth Pòrt dera Bonaigua coma gran referéncia de montanha d’aguesta corsa.
Dempús der exit der an passat, enguan coma principau nauetat, era marcha ciclotorista se conforme de 3 distàncies: 114 kms (Gran Fondo), 88 kms (Medio Fondo) e 46 kms (Mini Fondo). Era Gran Fondo puge dus viatges eth Pòrt dera Bonaigua, en tot passar per Esterri d’Àneu e es poblacions de Son e Jou entà tornar ara arribada plaçada en Vielha. Era Medio Fondo tanben supause coronar dus viatges eth Pòrt dera Bonaigua, mès sonque en tot arribar enquia Esterri d’Àneu entà dempús tornar tà Vielha. E, fin finau, ena Mini Fondo se puge sonque un viatge eth Pòrt dera Bonaigua, e se baishe en direccion tà Vielha.
Era Bonaigua Gran Fondo ei, per tant, ua grana oportunitat entà qu’es participaires poguen gaudir deth territòri en tot hèr espòrt, en tot trauessar ua bona part deth municipi de Vielha e Mijaran e dera Val d’Aran. Ei ua marcha ciclotorista dubèrta a toti es publics e nivèus.
Era gessuda ei prevista entàs 09.00 deth maitin e pendent eth recorregut e ena arribada i aurà plaçadi diuèrsi punts d’avitualhament damb bevendes e minjar.
“Vielha torne a acuélher era gessuda e era arribada dera Bonaigua Gran Fondo, en tot assolidar-se coma referent esportiu de montanha enes Pirenèus, en ua jornada que, de ben segur, serà d’ua berèsa esportiua e païsatgistica ara nautada de çò que merite Vielha e Mijaran, en tot crotzar diuèrsi pòbles deth municipi”, comente eth còsso d’Espòrts de Vielha e Mijaran, Alberto López.
10/06/2019