Notícies Veir istoric
Es dies 14, 15 e 16 de junh Era Audiovisuau de Vielha acuelh era representacion dera òbra de teatre musicau “Un viatge en deseme”
Es alumnes dera Escòla Tschaikovsky de Vielha tornaràn a èster es protagonistes dera quatau edicion d’aguest teatre musicau, e es beneficis anaràn destinadi as colònies tàs mainatges e mainades damb càncer organizades pera AECC Val d’Aran
Es dies 14, 15 e 16 de junh torne ua naua edicion deth teatre musicau que s’amie a tèrme en Era Audiovisuau de Vielha. Enguan era òbra ei titolada “Un viatge en deseme”, en tot èster dirigida per Miguel Pineda, e interpretada pes alumnes de Balh e Musica dera Escòla Tschaikowsky de Vielha.
Es entrades an un prètz de 4€ e se pòden crompar en Ajuntament de Vielha e Mijaran en orari d’atencion ath public o ena merceria “Flòc de Nhèu” (Avenguda Pas d’Arró 27, de Vielha). Enguan ei ja era quatau edicion d’aguest teatre musicau, e es diuèrses sessions auràn lòc entàs 19:30.
Es beneficis que se remassaràn d’aguesta òbra de teatre musicau anaràn destinadi integrament as colònies d’ostiu qu’organize era AECC Val d’Aran entàs mainatges e mainades d’entre 7 e 17 ans que patissen bèth tipe de cancer.
Aguestes colònies celebraràn enguan era sua 20au edicion, deth 14 ath 21 de junhsèga, damb er objectiu de normalizar era situacion des joeni, en tot realizar activitats d’òci, conéisher a d’auti joeni ena madeisha situacion e compartir experiéncies e vivéncies restacades damb era malautia qu’ei dificil de compartir damb d’autes persones.
“Èm fòrça contenti de poder acuélher en Era Audiovisuau de Vielha ua naua edicion deth teatre musicau, que cada an aumplís era sala de gent pendent es diuèrses sessions, e sustot, damb un objectiu fòrça important a nivèu sociau, coma ei remassar sòs entà ajudar as mainatges e mainades que participen cada an enes colònies d’ostiu dera Val d’Aran a trauès dera AECC Val d’Aran”, afirme era còsso de Cultura, Maria Vergés.
06/06/2019