Notícies Veir istoric
Vielha e Mijaran dessenhe un nau huelheton de senderisme entà méter en valor eth patrimòni naturau e culturau deth municipi
Aguest huelheton inclodís rotes que se pòden hèr pes terçons de Castièro e Marcatosa, e que formen part deth projècte Interreg POCTEFA “Reiaume der Aneto” en quau trabalhe er Ajuntament de Vielha e Mijaran pendent es darrèri ans
Er Ajuntament de Vielha e Mijaran a finalizat era elaboracion deth nau huelheton de rotes de senderisme que se pòden amiar a tèrme peth municipi, e que forme part deth projècte Interreg POCTEFA “Reiaume der Aneto” en quau i trabalhe er Ajuntament pendent es darrèri tres ans. Concretament, aguest huelheton mòstre ua rota que se pòt realizar en terçon de Castièro e ua rota que se pòt hèr en terçon de Marcatosa.
Per un costat, era rota per Castièro consistís en ua passejada de 3 a 4 ores, damb un desnivèu positiu e negatiu apuprètz de 500 mètres, e supause un recorregut finau de 15 kms. Aguesta rota permet veir bona part des endrets naturaus e culturaus deth municipi: Era Glèisa de Sant Miquèu de Vielha, era Glèisa de Sant Tomàs de Casarilh, era Glèisa de Sant Pèir d’Escunhau, eth Haro des Caperans, era Glèisa de Santa Maria de Mijaran e er arriu Nere entre d’auti.
Per un aute costat, era rota peth terçon de Marcatosa supause un recorregut d’entre 3 ores e 30 menutes enquia 4 ores, damb un desnivèu positiu e negatiu d’apuprètz 580 mètres, e que complète un totau de 18 kms. Aguesta rota permet descorbir paratges coma: era Glèisa de Sant Estèue de Montcorbau, era Glèisa de Sant Fèlix de Vilac, era Glèisa de Sant Martin de Tours de Gausac o era Glèisa deth Rosèr d’Aubèrt entre d’auti.
Aguesti huelhetons seràn disponibles aguesta madeisha primauera ena Oficina de Torisme de Vielha, en tot complementar ua ampla aufèrta toristica e esportiva en municipi.
02/05/2019