Notícies Veir istoric
Er Ajuntament de Vielha e Mijaran aufrís aguest dissabte en Palai de Gèu diuèrses Master Class gratuïtes de Power Gums e Cardiobox
Era installacion tanben a ampliat es classes de zumba, en tot passar de dus dies a quate setmanaus
Aguest pròplèu dissabte 23 de març eth Palai de Gèu de Vielha acuelh diuèrses Master Class de Power Gums e Cardiobox. Aguestes activitats populares, qu’aué dia son fòrça emergents laguens deth fitness, s’amiaràn a tèrme de franc, mès es inscripcions son limitades ara capacitat dera sala a on s’impartiràn.
Entàs 11:30 e es 18:00 auràn lòc es Master Class de Power Gums, mentre qu’entàs 19:00 s’impartirà era de Cardiobox. Es diuèrses sessions seràn a cargue der instructor Lázaro Hernández de Saragossa.
Enes sessions de Power Gums se trabalhe era resisténcia musculara, era poténcia e er equilibri, en tot emplegar gomes elastiques. Er objectiu ei aumentar era tonalitat musculara, era coordinacion, era prevencion de lesions, melhorar eth rendiment entà quinsevolh espòrt, auer un màger contròtle muscular e melhorar era circulacion dera sang.
Enes sessions de Cardiobox se combine en ua madeisha coreografia exercicis de bòxa e de fitness. Aguesta activitat preten activar tot eth còs e meter-mos en forma.
Entà inscriuer-se a bèra ua des sessions, podetz trucar ath telefon deth Palai de Gèu: 973642864 o ena recepcion dera pròpria installacion.
D’aute biais, a compdar d’aguest mes de març, s’an duplicat es sessions de zumba que s’amien a tèrme en Palai de Gèu. Enquiara i auie ua session dimars e ua auta dijaus, e ara tanben se realizen es deluns e dijaus.
Ath delà, a compdar d’abriu des dera installacion s’implementarà ua naua modalitat esportiua: eth jumping.