Notícies Veir istoric
Vielha e Mijaran arribe a un acòrd damb CaixaBank entath loguèr deth locau dera actuau Sala d’Exposicions municipau
Aguest espaci, que se lògue per un temps de 20 ans en tot ingressar 600.000€, seguirà acuelhent es diuèrses exposicions annaus organizades per Ajuntament. Atau madeish, damb aguest acòrd, CaixaBank amplie es sues oficines en tot convertir-se en
Er Ajuntament de Vielha e Mijaran a aprovat eth convèni peth quau enes pròplèus dies se signarà damb CaixaBank era cession, en regim de loguèr, era Sala d’Exposicions de Vielha ara entitat privada per un totau de 20 ans, temps en qu’es compdes publics municipaus ingressaran 600.000€.
En Plen der Ajuntament deth passat dimars se procedic a aprovar damb eth vòt favorable de toti es grops municipaus era desafectacion d’aguest ben de domèni public entà poder-lo logar. Atau donc, a compdar d’aguest ostiu, s’iniciaran es òbres a cargue dera entitat financèra entà adequar fisicament er espaci.
Aguesta cession respon ara volentat de CaixaBank d’ampliar es sues oficines actuaus ena Avenguda Pas d’Arró, en tot aufrir ua melhora des servicis, gràcies a ua ampliacion der orari, en tot daurir pendent es tardes, damb mès trabalhadors contractadi, en benefici des ciutadans damb ua melhora ena atencion ath client. Aguest nau modèl, coneishut coma Oficines Store, permet auer ua atencion ath public mès dirècta e personalizada e serà era prumèra Oficina d’aguest tipe deth parçan der Alt Pirineu.
“Damb aguest convèni artenhem qu’eth municipi pogue ingressar 30.000€ annaus de manèra que se poderà destinar aguesta quantitat de sòs a inversions de futur entara melhora de Vielha e Mijaran”, comente eth baile municipau, Juan Antonio Serrano. E hig que "aguest espaci contunharà en tot acuélher es diuèrses exposicions que cada an organize er Ajuntament, un ahèr qu’ei especificament acordat n’aguest convèni".