Notícies Veir istoric
Es dies 9 e 10 de març arriben es 2aus Jornades Europèes de Cinema de Montanha en Vielha e Mijaran
Aguest activitat includida en projècte Interreg POCTEFA “Reiaume der Aneto” cònste dera projeccion des melhores pellicules deth Bilbao Mendi Film Festival e era celebracion dera 2au edicion deth Concors de Cuertmetratges, damb naues categories
Es pròplèu dies 9 e 10 de març se celèbre en Vielha e Mijaran ua naua edicion des Jornades Europèes de Cinema de Montanha organizades per Ajuntament de Vielha e Mijaran amassa damb eth Bilbao Mendi Film Festival e era Agéncia KABI. Aguest festivau qu’ei laguens deth projècte Interreg POCTEFA “Reiaume der Aneto” supause era projeccion des melhores pellicules deth Bilbao Mendi Film Festival 2018, e tanben aurà lòc eth liurament de prèmis deth 2au Concors de Cuertmetratges “Vielha e Mijaran: montanha e cinema”, qu’enguan includís naues categories.
Dissabte 9 de març, a compdar des 19:00, ena Sala Era Audiovisuau de Vielha se projectarà eth film “The Dawn Hall” (Prèmi deth Jurat 2018). Ara seguida, se procedirà ath liurament des prèmis deth 2au Concors de Cuertmetratges “Vielha e Mijaran: montanha e cinema”. Enguan, aguesta concors a un totau de 3 categories: 2 entàs adults (cuertmetratges filmadi a trauès de camara e de telefòn mobil) e 1 categoria escolara, entà qu’es mès joeni tanben prenguen part d’aguesta activitat.
Dimenge 10 de març, a compdar des 19:00, se projectaràn es films “Wallmapu” (Seccion oficiau BMFF 2018), “The Search for the Wooo” (Seccion oficiau BMFF 2018) e “This Mountain Life” (Seccion oficiau BMFF 2018).
Es entrades entàs dus dies que dure eth festivau son de franc, mès se’n liuraràn enquia completar er aforament dera Sala Era Audiovisuau. Toti es interessadi en aquerir es entrades pòden recuelher-les en Ajuntament de Vielha e Mijaran, de deluns a diuendres en orari de 08:00 a 14:00 e tanben ena agéncia KABI (Avenguda Pas d’Arró 40 baishi) de 10:00 a 13:00 e de 17:00 a 20:00.
“Dempús der exit des prumères jornades der an passat, enguan i tornam damb mès pellicules e damb ua naua edicion deth concors de cuertmetratges qu’enguan amplie es categories entà que cada viatge mès gent pogue participar damb es sues creacions audiovisuaus”, comente era còsso de Cultura de Vielha e Mijaran, Maria Vergés. E hig que ”volem assolidar aguest tipe de festivau e, ath viatge, seguir en tot posicionar Vielha e Mijaran coma destinacion de montanha de referéncia enes Pirenèus e apropar era cultura e es valors qu’apòrte era montanha ara societat”.