Notícies Veir istoric
Era Generalitat active era Prealèrta deth Plan especiau d’emergéncies per lauegi, qu’ena Val d’Aran ei de nivèu 4
Se recomane fòrça precaucion, pr’amor que damb aguest nivèu, es lauegi pòden enterrar ara gent
Dempús der episòdi de nheuades d’aguest setmana, a compdar d’aguest
dimèrcles era Generalitat de Catalunya a activat era Prealèrta deth Plan especiau d’emergéncies per lauegi en Catalonha (ALLAUCAT).
Era nhèu constanta e eth vent an provocat qu’eth perilh sigue qualificat coma FÒRT (Nivèu 4) ena Val d’Aran e Franja Nòrd dera Palharesa a compdar de meddia. Se demoren queigudes naturaus de lauegi que poderàn afectar a quinsevolha orientacion. En generau seràn de mesura 3 (sufisent entà enterrar a un grop de persones), mès non s’escarte qu’ena vessant sud, a on i aurà mès acumulacions, se desprengue bèra ua de mesura 4. Ath delà, seràn fòrça probables desacadiaments de lauegi de placa ath pas d’ua persona en bona part deth terren de lauegi (arribents superiors a 30º) e en quinsevolha orientacion.
Per tant, deuant d’aguesta situacion de risc naut de lauegi, se recomane ara gent qu’age fòrça precaucion se se desplace a zònes a on i a risc de lauegi.
Entà poder veir es Bulletins deth Centre de Lauegi d’Aran, podetz visitar aguest link: http://lauegi.conselharan.org/boletines/nheu-naua-3/?lang=oc