Notícies Veir istoric
Juan Antonio Serrano mòstre era preocupacion der Ajuntament de Vielha e Mijaran pera nauta inseguretat dera N-230
Deuant des darrèri casi d’accidents e situacions de perilhositat que s’an patit n’aguesta via, reclame mesures urgentes entà esvitar mès risqui entàs usatgèrs e tàs vesins de Vielha e Mijaran
Eth baile de Vielha e Mijaran, Juan Antonio Serrano, a mostrat era sua preocupacion deuant dera nauta inseguretat que se viu actuaument en tor ara N-230, principiau via d’entrada e gessuda ena Val d’Aran e que vertèbre bona part deth territòri. Pendent aguesti darrèri dies s’an viscut diuèrses situacions qu’an aumentat aguesta sensacion d’inseguretat ena carretèra, e qu’an agut as camions coma principaus protagonistes.
Per un costat, an circulat pes hilats sociaus
diuèrsi vidèos de camions que condusien de manèra temerària, damb
auançaments illegaus, un ena entrada de El Pònt de Suert e un aute ena
gessuda sud deth Tunèl de Vielha, en tot incomplir eth còdi de
circulacion e metent en perilh era sua pròpria vida e era des auti
usatgèrs dera via. Ath delà, en Vielha tanben i auec un incident damb un
camion, qu’aguest dimèrcles perdec era sua carga ena carretèra deth
Tunèl de Vielha (deuant dera gasolinèra d’entrada ath pòble), en tot
veder-se afectat eth trànsit pendent diuèrses ores.
"Èm fòrça preocupadi pes contunhades situacions d’inseguretat que viuem damb era N-230. Cada an, patim fòrça casi d’accidents”, comente eth baile de Vielha e Mijaran, Juan Antonio Serrano, e hig que "ei de besonh que s’amien a tèrme melhores urgentes ena via, e pr’amor d’ açò auem demanat ua amassada damb eth secretari d’Estat d’Infraestructures. Auem de besonh solucions reaus a un problèma que hè fòrça ans que patim".
19/01/2019