Notícies Veir istoric
Auancen es trabalhs deth projècte Interreg Poctefa “Reiaume der Aneto”
Es escòles de Vielha, Luishon e Benasque, atau coma representants de diuèrses associacions culturaus des tres municipis, s’amassèren aguesta setmana en Vielha entà definir es accions conjuntes a amiar a tèrme enes airaus escolars, lingüistics
Pendent aguesta setmana s’amassauen ena sala de plens der Ajuntament de Vielha e Mijaran representants dera Escòla Garona de Vielha, dera Escòla de Benasque (CRA-Alta Ribagorza), dera Asociación Guayente de Benasque e deth Centre d’Estudis Aranesi e representants dera Mairie de Luchon entà definir diuèrses accions enes encastres dera escòla, dera lengua e dera cultura enes tres municipis, enmercades en projècte Interreg Poctefa “Reiaume der Aneto” que desvolòpen conjuntament.
Atau donc, aguesta amassada de trabalh servic entà estudiar era possibilitat d’aprigondir enes escambis escolars que Benasque e Luishon vien desvolopant es darrèri ans e qu’ara se preten qu’incorpòren tanben ara Escòla Garona de Vielha. Damb aguesti escambis se trabalhen es relacions entre es escolans des diuèrsi centres que compartissen realitats similars e que servissen entà dar a conéisher eth trabalh que cada centre realize. Atau madeish, e pr’amor qu’es tres centres trabalhen tanben damb ua lengua pròpria, se preten desvolopar diuèrses activitats qu’includisquen er emplec d’aguestes lengües a trauès deth format audiovisuau.
En un aute apartat, s’a trabalhat tanben ath torn des tres festivaus de cinema que s’organizen en cadun des municipis e d’iniciar ua linha de trabalh entà que se pogue ampliar era collaboracion n’aguesta activitat. Maria Vergés, 2au tinent d’alcalde der Ajuntament de Vielha e Mijaran manifestaue que “aguesta a estat ua amassada fòrça profitosa a on auem podut extrèir quauques propòstes entà desvolopar que, mès enlà dera finalizacion deth projècte Interreg Poctefa, siguen accions que poguen seguir existint, coma eth festivau de cine, eth concors de cuertmetratges o era relacion entre es escòles e es associacions” e higie que “un des objectius importants d’aguest projècte transfronterèr ei eth de capitalizar es relacions damb es agents estrategics deth territòri”.
18/01/2019