Notícies Veir istoric
Er Ajuntament de Vielha e Mijaran s’amasse damb era secretària d’Estat entar espòrt, Mª José Rienda, entà tractar sus era situacion deth Palai de Gèu
Eth baile de Vielha e Mijaran Juan Antonio Serrano amassa damb eth còsso d’Espòrts, Alberto López, e eth deputat provinciau, Francés Boya, an tractat damb era Secretària d’Estat sus era possibilitat d’implicacion der Estat en Palai de Gèu
Aguest diuendres, eth baile de Vielha e Mijaran, Juan Antonio Serrano, eth còsso d’Espòrts, Alberto López, e eth deputat provinciau, Francés Boya, s’an amassat en Madrid damb era Secretària d’Estat entar espòrt e Presidenta deth Consejo Superior de Deportes, Mª José Rienda. Pendent aguesta amassada, an transmetut a Rienda quina era situacion actuau pera qué passe era installacion deth Palai de Gèu.
Dempús dera grèu pana dera pista de gèu, qu’a obligat a barrar aguesta part der equipament, e dempús des dificultats qu’aguesta infraestructura atrauèsse per çò que hè ath mantenement e inversions de besonh, er Ajuntament de Vielha e Mijaran a iniciat d’un temps ençà contactes damb diuèrses administracions entà sajar d’obtier era sua implicacion en mantenement deth Palai de Gèu, qu’actuament depen integrament der Ajuntament.
Actuaument era Deputacion de Lleida ei era unica administracion publica qu’a confirmat eth sòn compromís de collaboracion damb er Ajuntament ena mantenença deth Palai de Gèu.
Pendent era amassada s’a parlat sus era problematica actuau dera installacion autant a nivèu economic coma estructurau. Ath delà, s’a insistit en besonh deth finançament per part d’autes administracions publiques en Palai de Gèu entà assegurar era sua viabilitat en futur. S’estudiarà eth modèl de gestion entà créisher enquia un centre esportiu d’airau nacionau e de tecnificacion d’espòrts d’iuèrn. E fin finau, Rienda a deishat dubèrta era pòrta a ua possibla collaboracion der Estat en futur der equipament.
Aguesta implicacion der Estat ei important, pr’amor qu’actuaument se trabalhe en ua futura candidatura de Barcelona e es Pirenèus entà organizar uns Jòcs Olimpics d’iuèrn, a on era participacion dera Val d’Aran serie clau, damb era representacion d’esportistes aranesi ena candidatura olimpica.
Juan Antonio Serrano a declarat que “Prumerament voi arregraïr era trabalh e gestions hètes peth deputat provinciau, Francés Boya, autant damb era pròpria Deputacion, coma damb era Secretaria d’Estat, gestions qu’a possibilitat qu’aguesta amassada s’age amiat a tèrme”. E a hijut que “trabalham entà arténher era maximala implicacion des administracions publiques en futur deth Palai de Gèu pr’amor que sabem qu’ei un equipament de prumèr orde deth nòste territòri e, n’aguestes condicions, se hè fòrça complicat que depene exclusivament deth pressupòst municipau”.
Era volentat finau der Ajuntament de Vielha e Mijaran ei obtier aguesta implicacion publica entà qu’eth Palai de Gèu sigue en condicions viables de sostenibilitat e mantenement avientes entàs pròplèu ans.