Notícies Veir istoric
Era Deputacion de Lleida ei era prumèra administracion que s’implique damb eth Palai de Gèu de Vielha
Aguest diuendres, pendent eth Plen dera Deputacion, s’a aprovat eth pressupòst dera institucion entà 2019, en qué per prumèr viatge i a inclodida ua partida de 100.000 € destinada ath mantenement deth Palai de Gèu
Aguest dijaus eth Plen dera Deputacion de Lleida amassat en session ordinària, a aprovat eth sòn pressupòst entar exercici de 2019 que, per prumèr viatge, conten ua partida especifica de 100.000 € destinada ath mantenement deth Palai de Gèu de Vielha.
Damb aguesta mesura, era Deputacion de Lhèida se presente coma era prumèra, e per ara unica, administracion publica que pren responsabilitat e s’implique damb aguesta installacion, que depen enquiath moment, unicament der Ajuntament de Vielha e Mijaran.
Tot e qu’era institucion provinciau a balhat ajudes puntuaus entà poder afrontar despenes coma eth cambi dera cortina que separe era pista de gèu dera piscina (que representaue un risc tara seguretat) coma era modernizacion e legalizacion dera installacion, ei ara que pren un compromís en fèrm en tot inclodir ua partida fixa en sòn pressupòst annau.
“Aguesta ei ua plan bona noticia entà Vielha e Mijaran que, ara fin, tròbe eth compromís d’ua auta administracion, n’aguest cas d’ua coma era Deputacion de Lleida tant importanta tàs ajuntaments dera demarcacion a qui cau arregraïr era sua implicacion” declaraue Juan Antonio Serrano, alcalde de Vielha e Mijaran e higie que “eth municipi de Vielha e Mijaran a estat tostemp solet tà afrontar era gestion e eth deficit deth Palai de Gèu, causa que condicione en grana mesura es pressupòsti e recorsi municipaus, tot e qu’aguest ei un equipament deth qué gaudissen toti es aranesi e visitaires”.
Atau madeish, Serrano manifestaue eth sòn arregraïment “ath deputat provinciau Francés Boya, qui a collaborat estretament damb er Ajuntament en aguest ahèr entot trabalhar entà arténher aguest acòrd”.