Notícies Veir istoric
Aguest Nadau, er Ajuntament de Vielha e Mijaran aufrís ua activitat d’arqueologia subaquatica en Palai de Gèu entara mainadèra
Es dies 28 e 29 de deseme, s’amiarà a tèrme era activitat "Uluburun: Un naufragi ena piscina" entàs joeni de 7 a 14 ans
Aguest Nadau, era mainadèra entre 7 e 14 ans compde damb ua naua activitat que s’amiarà a tèrme en Palai de Gèu de Vielha. Se tracte d’ua activitat d’arqueologia subaquatica titolada Uluburun: Un naufragi ena piscina. Aguesta accion se realizarà es dies 28 e 29 de deseme e i aurà dues sessions per dia: Ath maitin, d’11:00 a 13:00 e pera tarde des 17:00 as 19:00. Era entrada ei gratuïta damb er abonament, mès cau reservar plaça ena recepcion deth Palai de Gèu. Er unic requisit que se demane ei saber nadar.
Uluburun: Un naufragi ena piscina ei ua activitat didactica de divulgacion cientifica unica e innovadora, autant des deth punt de vista dera didactica, coma deth rigor arqueologic. Se compde damb era collaboracion dera Universitat de Saragossa e er Institut of nautical archaeology (Texas), descorbidors deth jadiment arqueologic d’Uluburun.
Pendent era activitat, es participaires poderàn rescatar pèces arqueologiques en tot amiar a tèrme eth trabalh d’un arqueològ subaquatic. Uluburun ei un vaishèth que s’enfonsèc en an 1300 a.c. deuant des còstes de Turquia, e que transportaue rèstes de cinc cultures desparières. Per tant, a un gran valor istoric, en tot èster un viatge ath passat enquiara fin dera Edat de Bronze.
Segontes eth còsso d’Espòrts e Joenessa de Vielha e Mijaran, Alberto López, “damb aguesta iniciativa incrementam era aufèrta ludica e esportiva en Palai de Gèu, en ua epòca a on era mainadèra a fòrça temps liure”. E hig qu’”auem de profitar que dispausam d’un gran equipament entara practica dera natacion, entà que fòrça joeni ne treiguen profit e la gaudisquen entà Nadau, en tot júnher espòrt e arqueologia”.
13/12/2018