Notícies Veir istoric
Eth Palai de Gèu de Vielha amplie era sua aufèrta ludica damb naues classes de zumba e de iòga
Era zumba s’a recuperat es dimars e dijaus, mentre qu’es sessions de iòga que tanben s’amien a tèrme dimars e dijaus, compden damb ua classa mès es dijaus
A compdar d’aguesta tardor, eth Palai de Gèu de Vielha a ampliat era sua aufèrta ludica pendent es dimars e es dijaus, damb dues activitats: era zumba e eth iòga.
En çò que tanh ara zumba, aguesta activitat ja s’auie hèt hè uns ans e s’a tornat a recuperar enguan. En aguest sens, s’amie a tèrme toti es dimars e es dijaus entre es 20:00 e es 21:00 e ei disponibla sonque entàs abonats deth Palai de Gèu.
Per un aute costat, eth iòga, que ja s’amie a tèrme pendent es darrèri ans de manèra regulara, amplie era sua aufèrta damb ua session mès. Es classes s’impartissen es dimars entre es 15:30 e es 16:50 e entre es 17:20 e es 18:40. E es dijaus, an lòc entre es 11:30 e es 12:50 e ara tanben entre es 15:30 e es 16:50. Per tant, son quate sessions d’1 ora e 20 menutes cadua. Deuant dera nauta participacion que i a en aguesta activitat, ei de besonh reservar plaça damb bèth dia d’anticipacion entà assegurar disponibilitat. Aguesta resèrva se pòt hèr ena pròpria installacion deth Palai de Gèu o en tot trucar ath telefòn 973642864.
“Damb aguestes activitats diversificam encara mès era aufèrta ludica qu’es vesins deth municipi e de tota era Val d’Aran pòden amiar a tèrme en Palai de Gèu de Vielha”, comente eth còsso d’Espòrts de Vielha e Mijaran, Alberto López. E hig qu’”aguesta installacion ei er equipament esportiu e ludic de referéncia, e per açò incorporam naues activitats entà que lo pogue gaudir eth maximal numerò de gent possible”.